ການຢ້ຽມຢາມແຂວງຫູເປີຍຂອງທ່ານສີຈິ້ນຜິງມີຄວາມໝາຍອັນເລິກເຊິ່ງຄືແນວໃດ?

ລະຫວ່າງວັນທີ ພະຈິກ 2024, ທ່ານສີຈິ້ນຜິງ ປະທານປະເທດຈີນໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຫູເປີຍ ພາກກາງຂອງຈີນ. ໃນການເຄື່ອນໄຫວເຮັດວຽກຄັ້ງນີ້ ເພິ່ນໄດ້ລົງເລິກໄປຢ້ຽມຢາມບ່ອນໃດ? ມີຄວາມໝາຍອັນເລິກເຊິ່ງຄືແນວໃດ?

ເພີ່ມທະວີການຄົ້ນຄວ້າບູຮານຄະດີ ຍົກສູງລະດັບການອະນຸລັກວັດຖຸບູຮານ

ຕອນບ່າຍວັນທີ 4 ພະຈິກ 2024, ທ່ານສີຈິ້ນຜິງໄດ້ເດີນທາງໄປຫໍພິພິທະພັນເມືອງຢູນເມີ້ງນະຄອນຊ້ຽວການ ເຊິ່ງເປັນບ່ອນທຳອິດທີ່ເພິ່ນລົງເຄື່ອນໄຫວຢ້ຽມຢາມແລະເຮັດວຽກຢູ່ແຂວງຫູເປີຍໃນຄັ້ງນີ້ ໂດຍໄດ້ລົງເລິກຮັບຮູ້ສະພາບການກ່ຽວກັບທ້ອງຖິ່ນແຫ່ງນີ້ເພີ່ມທະວີການຄົ້ນຄວ້າ ອະນຸລັກ ແລະ ນຳໃຊ້ວັດຖຸບູຮານ.

ເມືອງຢູນເມີ້ງຕັ້ງຢູ່ພາກກາງຂອງແຂວງຫູເປີຍ, ເປັນເມືອງສຳຄັນດ້ານວັດຖຸບູຮານຂອງຈີນ. ຢູ່ຫໍພິພິທະພັນເມືອງຢູນເມີ້ງ, ທ່ານສີຈິ້ນຜິງໄດ້ຮັບຟັງການແນະນຳຢ່າງລະອຽດຈາກພະນັກງານກ່ຽວກັບເນື້ອໃນ, ຄຸນຄ່າທາງດ້ານວັດທະນະທຳປະຫວັດສາດ ກໍຄືສະພາບການຄົ້ນຄວ້າ ແລະ ອະນຸລັກປຶ້ມບູຮານທີ່ເຮັດດ້ວຍໄມ້, ໂດຍຊີ້ນຳໃຫ້ສືບຕໍ່ເພີ່ມທະວີການຄົ້ນຄວ້າບູຮານຄະດີ, ຍົກສູງລະດັບການອະນຸລັກວັດຖຸບູຮານ.

ທ່ານສີຈິ້ນຜິງໄດ້ເອົາໃຈໃສ່ວຽກງານຄົ້ນຄວ້າ ອະນຸລັກ ແລະ ນຳໃຊ້ວັດຖຸບູຮານມາໂດຍຕະຫຼອດ ເພິ່ນເຫັນວ່າ: ການອະນຸລັກວັດຖຸບູຮານເປັນການສ້າງຜົນງານໃນຍຸກປັດຈຸບັນ ແລະ ມີຜົນປະໂຫຍດຕໍ່ຄົນຮຸ່ນຫຼັງ. ສິ່ງນີ້ຄືເນື້ອໃຈໃຈກາງຂອງແນວຄິດສີຈິ້ນຜິງດ້ານວັດທະນະທຳ.

ການພັດທະນາກະສິກຳທັນສະໄໝຕ້ອງອີງໃສ່ຄວາມກ້າວໜ້າດ້ານວິທະຍາສາດເຕັກໂນໂລຊີ

ການພັດທະນາຊົນນະບົດໃຫ້ຈະເລີນເປັນຈຸດສຸມອັນສຳຄັນທີ່ທ່ານສີຈິ້ນຜິງໄດ້ເອົາໃຈໃສ່ໃນເວລາລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ທ້ອງຖິ່ນ. ຕອນເຊົ້າວັນທີ 5 ພະຈິກ2024, ທ່ານສີຈິ້ນຜິງໄດ້ເດີນທາງໄປເມືອງເຈ່ຍຢວີ ນະຄອນສຽນນິງ ເພື່ອເກັບກຳສະພາບການຊຸກຍູ້ການພັດທະນາຊົນນະບົດໃຫ້ຈະເລີນຢ່າງຮອບດ້ານຂອງທ້ອງຖິ່ນແຫ່ງນີ້.

ທ່ານສີຈິ້ນຜິງໄດ້ລົງໄປພື້ນທີ່ການຜະລິດກະສິກຳໂດຍສອບຖາມຢ່າງລະອຽດກ່ຽວກັບສະພາບການຕ່າງໆເຊັ່ນ:ແນວພັນຜັກ, ເຕັກນິກການປູກ, ສະພາບການຈຳໜ່າຍ ເປັນຕົ້ນ. ເພິ່ນເນັ້ນໜັກວ່າ: ການພັດທະນາກະສິກຳທັນສະໄໝຕ້ອງອີງໃສ່ຄວາມກ້າວໜ້າດ້ານວິທະຍາສາດເຕັກໂນໂລຊີ, ເຮັດໃຫ້ວິທະຍາສາດເຕັກໂນໂລຊີເສີມສ້າງຄວາມເຂັ້ມແຂງປຽບເໝືອນຕື່ມປີກບິນໃຫ້ແກ່ກະສິກຳທັນສະໄໝ. ທ່ານສີຈິ້ນຜິງກ່າວວ່າ: ການຊຸກຍູ້ຄວາມທັນສະໄໝແບບຈີນ ແມ່ນຕ້ອງເລັ່ງຊຸກຍູ້ການພັດທະນາຊົນນະບົດໃຫ້ຈະເລີນ, ກ່ອນອື່ນໝົດແມ່ນຕ້ອງພັດທະນາອຸດສາຫະກິດທີ່ສ້າງຄວາມຮັ່ງມີໃຫ້ແກ່ປະຊາຊົນ.