ໜ່ວຍງານການແພດ “ຂະບວນລົດໄຟສັນຕິພາບ” ຂອງກອງທັບປົດປ່ອຍປະຊາຊົນຈີນເດີນທາງໄປຮອດນະຄອນຫຼວງວຽງຈັນ

ວັນທີ 14 ພະຈິກນີ້, ໜ່ວຍງານພະລາທິການດ້ານເສນາຮັກຂອງຈີນທີ່ເຂົ້າຮ່ວມການເຝິກຊ້ອມຮ່ວມດ້ານການຊ່ວຍເຫຼືອການແພດມະນຸດສະທຳພາຍໃຕ້ຫົວຂໍ້ “ຂະບວນລົດໄຟສັນຕິພາບ 2024” ໄດ້ເດີນທາງໄປຮອດນະຄອນຫຼວງວຽງຈັນປະເທດລາວ, ຈະຮ່ວມກັບໜ່ວຍງານພະລາທິການດ້ານເສນາຮັກຂອງກອງທັບປະຊາຊົນລາວດຳເນີນການການເຝິກຊ້ອມຮ່ວມໃນວຽກງານພະລາທິການດ້ານເສນາຮັກແລະ ກິດຈະກໍາບໍລິການທາງການແພດເປັນເວລາ 14 ວັນ.

ຕາມຂ່າວລາຍງານວ່າ: ໜ່ວຍງານການແພດຂອງຈີນທີ່ເຂົ້າຮ່ວມກິດຈະກຳຄັ້ງນີ້ໄດ້ເດີນທາງດ້ວຍລົດໄຟການແພດຂອງກອງທັບຈີນເຂົ້າສູ່ປະເທດລາວຜ່ານທາງລົດໄຟຈີນ-ລາວ. ຫຼັງຈາກໄປຮອດສະຖານີໂພນໂຮງແລ້ວ, ໜ່ວຍງານການແພດຈີນໄດ້ປະສານສົມທົບກັບພາກສ່ວນທີ່ກ່ຽວຂ້ອງຂອງລາວຢ່າງໃກ້ຊິດ ເພື່ອຂົນອຸປະກອນລົງຈາກລົດຢ່າງວ່ອງໄວ.

ໃນຂະນະເດີນທາງດ້ວຍລົດໄຟການແພດ, ໜ່ວຍງານການແພດຈີນຍັງໄດ້ດຳເນີນການເຝິກຊ້ອມຕ່າງໆຄືເຫດການຕົວຈິງ ເຊັ່ນ: ການກອບກູ້ສຸກເສີນຢູ່ພາກສະໜາມ, ການຜ່າຕັດ, ການປິ່ນປົວຄົນເຈັບສາຫັດ ແລະ ການຮັບປະກັນດ້ານການແພດເປັນຕົ້ນ.