ສູນກາງພັກກອມມູນິດຈີນສົ່ງສານອວຍພອນໄປຍັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກ ປປລ ໄດ້ສ່ອງແສງໃຫ້ເຫັນເຖິງນ້ຳໃຈ 4 ດີລະຫວ່າງສອງພັກແລະສອງລັດ
ການແຜ່ລະບາດຂອງພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນໃນປີ 2020 ໄດ້ສ້າງຜົນກະທົບໃຫ້ແກ່ການຮ່ວມມືລະຫວ່າງສອງປະເທດໃນລະດັບໃດໜຶ່ງ, ແຕ່ສອງປະເທດໄດ້ຮ່ວມມືກັນຢ່າງຕັ້ງໜ້າ ແລະ ຍາດໄດ້ຜົນສຳເລັດໃນການປ້ອງກັນແລະຄວບຄຸມການແຜ່ລະບາດຂອງພະຍາດ. ຄຽງຄູ່ກັບສະພາບການແຜ່ລະບາດຂອງພະຍາດຖືກຄວບຄຸມໄວ້ໄດ້ ແລະ ການປ້ອງກັນພະຍາດເຂົ້າສູ່ສະພາບການປົກກະຕິ, ສອງປະເທດໄດ້ຕັ້ງໜ້າປ້ອງກັນແລະຄວບຄຸມພະຍາດ ແລະ ໄດ້ພັດທະນາເສດຖະກິດສັງຄົມໄປພ້ອມໆກັນ ໂດຍໄດ້ເປີດ “ຊ່ອງທາງພິເສດ” ໃນທັນທີ ເພື່ອສະໜັບສະໜູນການໄປມາຫາສູ່ກັນແບບປົກກະຕິ.
ນອກນີ້, ການຮ່ວມມືກັນເພື່ອລຶບລ້າງຄວາມທຸກຍາກກໍແມ່ນວຽກງານພົ້ນເດັ່ນໃນການພົວພັນລະຫວ່າງສອງປະເທດ. ປີ 2018 ແລະ ປີ 2019, ສະຫາຍເລຂາທິການໃຫຍ່ບຸນຍັງ ວໍລະຈິດໄດ້ເດີນທາງໄປຖອດຖອນບົດຮຽນຫຼຸດຜ່ອນຄວາມທຸກຍາກຂອງຈີນຢູ່ແຂວງຫູໜານ ແລະ ແຂວງອານຮຸຍຂອງຈີນ. ການເຄື່ອນໄຫວຢ້ຽມຢາມແບບພິເສດດັ່ງກ່າວເປັນວາລະການຢ້ຽມຢາມທີ່ເກືອບບໍ່ເຄີຍມີຈັກເທື່ອສຳລັບປະມຸກລັດຕ່າງປະເທດທີ່ເດີນທາງມາຢ້ຽມຢາມຈີນ. ອາດເວົ້າໄດ້ວ່າ: ຍ້ອນວຽກງານຫຼຸດຜ່ອນຄວາມທຸກຍາກຂອງຈີນໄດ້ປະສົບຜົນສຳເລັດອັນໃຫຍ່ຫຼວງ ແລະ ສະຫາຍເລຂາທິການໃຫຍ່ບຸນຍັງ ວໍລະຈິດກໍໃຫ້ຄວາມສົນໃຈແລະເອົາໃຈໃສ່ຢ່າງສູງຕໍ່ວຽກງານລຶບລ້າງຄວາມທຸກຍາກຂອງປະເທດລາວ.
ປີ 2021 ແມ່ນປີລະນຶກການສ້າງຕັ້ງສາຍສຳພັນທາງການທູດລາວ-ຈີນຄົບຮອບ 60 ປີ. ເວົ້າສຳລັບສອງປະເທດລາວ-ຈີນແລ້ວ, ປີ 2021 ເປັນປີໜຶ່ງທີ່ສຳຄັນທີ່ສຸດ. ພັກປະຊາຊົນປະຕິວັດລາວ ທີ່ເປັນພັກກຳອຳນາດຂອງລາວໄດ້ຈັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງຕົນໃນເວລານີ້, ຍ່ອມຈະສືບຕໍ່ລົງເລິກການຮ່ວມມືຍຸດທະສາດຮອບດ້ານລາວ-ຈີນ, ຊຸກຍູ້ໃຫ້ການພົວພັນລະຫວ່າງສອງປະເທດ ແລະ ການສ້າງຄູ່ຮ່ວມຊາຕາກຳລາວ-ຈີນກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ, ຍ່ອມຈະສ້າງຜົນປະໂຫຍດໃຫ້ແກ່ປະຊາຊົນສອງຊາດ ແລະ ເປັນການປະກອບສ່ວນທີ່ໃຫຍ່ຫຼວງກວ່າເກົ່າໃນການປົກປັກຮັກສາສັນຕິພາບ, ສະຖຽນລະພາບ, ການພັດທະນາ ແລະ ຄວາມຈະເລີນຮຸ່ງເຮືອງຂອງພາກພື້ນ ກໍຄືຂອງໂລກ.
Share with:
2021-01-14 19:17:21 cri
ສູນກາງພັກກອມມູນິດຈີນສົ່ງສານອວຍພອນໄປຍັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກ ປປລ ໄດ້ສ່ອງແສງໃຫ້ເຫັນເຖິງນ້ຳໃຈ 4 ດີລະຫວ່າງສອງພັກແລະສອງລັດ