ທ່ານ ໂຈ່ວເວີຍຈົ່ງ ເຮັດໃຫ້ຊີວິດຂອງຊາວບ້ານນັບມື້ນັບຈະເລີນຮຸ່ງເຮືອງຂຶ້ນ

cri2024-09-30 11:27:32

ບ້ານ ຢຽນຈ່ຽງ ທີ່ຕັ້ງຢູ່ຝັ່ງເໜືອແມ່ນ້ຳຢັງຊີກຽງນັ້ນ ແມ່ນເຂດອະນຸລັກຖາວອນຂອງພື້ນທີ່ກະສີກຳຂັ້ນພື້ນຖານລະດັບຊາດ, ໃນທົ່ວບ້ານມີທີ່ດິນປູກຝັງ 250 ກວ່າເຮັກຕາ, ຜົນຜະລິດຈາກການປູກເຂົ້າ, ເຂົ້າບະເລ ແລະ ຜະລິດຕະພັນອື່ນໆ ແມ່ນເສົາຄ້ຳຫຼັກຂອງບ້ານ. ໃນຫຼາຍປີມໍ່ໆມານີ້, ຍ້ອນໂຄງປະກອບການຜະລິດພຽງຢ່າງດຽວ ແລະ ຮູບການຜະລິດທີ່ມີປະສິດທິພາບຕ່ຳ, ບວກກັບແຮງງານໄວໜຸ່ມໄວກາງຄົນພາກັນໄປເຮັດວຽກຢູ່ຕ່າງຖິ່ນ ຈຶ່ງເຮັດໃຫ້ການພັດທະນາຂອງບ້ານຢຽນຈ່ຽງໄດ້ຜະເຊີນກັບສິ່ງທ້າທາຍຢ່າງຮ້າຍແຮງ.

ຫຼັງຈາກຂຶ້ນຮັບຕຳແໜ່ງເປັນເລຂາທີ 1 ຂອງບ້ານຢຽນຈ່ຽງ ຕາແສງຊິ່ນເຊີງ ເມືອງຢີເຈີ່ງ ນະຄອນຢາງໂຈ່ວ ແຂວງຈ່ຽງຊູ່ແລ້ວ, ທ່ານ ໂຈ່ວເວີຍຈົ່ງ ໄດ້ເປິກສາຫາລືກັບຄະນະກຳມະການບ້ານວ່າ: ຈະລົງມືພາຊາວບ້ານປູກເຂົ້າກ່ອນ ເຊິ່ງບໍ່ພຽງແຕ່ສາມາດແກ້ໄຂບັນຫາທີ່ດິນບໍ່ມີຄົນປູກ ແລະ ຍົກສູງປະສິດທິຜົນການນຳໃຊ້ທີ່ດິນເທົ່ານັ້ນ ຍັງສາມາດສ້າງເສດຖະກິດລວມໝູ່ຂອງບ້ານໃຫ້ໃຫຍ່ຂຶ້ນ ແລະ ເຮັດໃຫ້ຊາວບ້ານມີລາຍໄດ້ເພີ່ມຂຶ້ນນຳອີກ. ແຕ່ຕ້ອງປູກຝັງຕາມຫຼັກວິທະຍາສາດ ແລະຍັງຕ້ອງອາໄສກຳລັງຈາກ “ພາຍນອກ”.

ພາຍໃຕ້ການສະເໜີ ແລະ ຊຸກຍູ້ຈາກທ່ານ ໂຈ່ວເວີຍຈົ່ງ, ຄະນະພັກຂອງ 4 ພາກສ່ວນໃນທ້ອງຖິ່ນໄດ້ຮ່ວມກັນສ້າງຕັ້ງແຫຼ່ງປູກເຂົ້າດີເດັ່ນ 20 ເຮັກຕາ ແລະແຫຼ່ງຜະລິດຜະລິດຕະພັນກະສິກຳສີຂຽວ 3,7 ເຮັກຕາ ເພື່ອປູກເຂົ້າແນວພັນດີເດັ່ນທີ່ສະຖາບັນຄົ້ນຄວ້າກະສິກຳສະເໜີໃຫ້ ພ້ອມທັງສ້າງໂຮງເຮືອນປູກຜັກແບບທັນສະໄໝ 11 ແຫ່ງ.

ປີ 2023, ເພື່ອຍົກສູງມູນຄ່າຂອງຍີ່ຫໍ້, ທຸກຝ່າຍໄດ້ຮ່ວມກັນຈົດທະບຽນເຄື່ອງໝາຍສິນຄ້າ “ບ້ານຊູ່ຕ້ຽນ”. ໃນສອງປີມານີ້, ຜະລິດຕະພັນກະສິກຳຈາກແຫຼ່ງຜະລິດ ສາມາດເພີ່ມລາຍໄດ້ເກືອບ 3 ແສນຢວນໃຫ້ແກ່ບ້ານຕໍ່ປີ. ໃນປີດຽວກັນ, ສະຫະກອນຮ່ວມມືເສດຖະກິດຂອງບ້ານ ໄດ້ເບີກຈ່າຍຜົນກຳໄລໃຫ້ຊາວບ້ານເປັນເທື່ອທຳອິດ ນັບແຕ່ສ້າງຕັ້ງຂຶ້ນເປັນຕົ້ນມາ.

ທ່ານ ໂຈ່ວເວີຍຈົ່ງ ມີຄວາມເຫັນຕະຫຼອດມາວ່າ: ບໍ່ພຽງແຕ່ຕ້ອງເຮັດໃຫ້ກະເປົ໋າເງິນຂອງຊາວບ້ານຕື່ງຂຶ້ນ ຍັງຕ້ອງເຮັດໃຫ້ຈິດໃຈຂອງຊາວບ້ານອຸດົມສົມບູນຂຶ້ນ. ຢູ່ບ້ານຢຽນຈ່ຽງ ມີຊຸບເປີມາເກັດ “ໃຈບຸນ” ແຫ່ງໜຶ່ງ, ຊື້ເຄື່ອງຢູ່ຮ້ານນີ້ໂດຍບໍ່ຕ້ອງຈ່າຍເງິນ ຂໍພຽງແຕ່ເຮັດເລື່ອງດີໆໃຫ້ແກ່ບ້ານ ເພື່ອສະສົມຄະແນນ ແລະ ເອົາໄປແລກສິນຄ້າຂອງຮ້ານນີ້ໄດ້. ທ່ານ ໂຈ່ວເວີຍຈົ່ງ ເວົ້າວ່າ: ຜ່ານການຊັກນຳຢ່າງຕໍ່ເນື່ອງຂອງບ້ານ ຊຸບເປີມາເກັດນີ້ຈະສາມາດສ້າງນິດໄສທາງສັງຄົມທີ່ດີງາມໃນການເປັນຄົນດີ ແລະ ເຮັດເລື່ອງທີ່ດີ.

ແຕ່ກ່ອນ, ໃນບ້ານຢຽນຈ່ຽງມີແຕ່ທາງຫີນທີ່ເປັນຊຸມຫຼາຍ ທັງບໍ່ມີດອກໄຟຢູ່ສອງຂ້າງທາງ. ພາຍໃຕ້ການຊຸກຍູ້ຢ່າງຕັ້ງໜ້າຈາກທ່ານ ໂຈ່ວເວີຍຈົ່ງ, ທຸກຂັ້ນໃນສັງຄົມໄດ້ຮ່ວມກັນລະດົມເງິນ ແລະ ສ້ອມແປງເສັ້ນທາງດັ່ງກ່າວໃຫ້ເປັນທາງຊີມັງທີ່ທັງກວ້າງທັງພຽງ ແລະຍັງໄດ້ຕິດຕັ້ງດອກໄຟແບບປະຢັດໄຟຟ້າ ເຊິ່ງສາມາດປະຢັດຄ່າໄຟຟ້າໄດ້ຢ່າງຫຼວງຫຼາຍໃນແຕ່ລະປີ.

ປີ 2024, ທ່ານ ໂຈ່ວເວີຍຈົ່ງ ສືບຕໍ່ຕຳແໜ່ງອີກວາລະໜຶ່ງ, ທ່ານໄດ້ຊຸກຍູ້ໃຫ້ສ້າງຕັ້ງສະຫະກອນຮ່ວມມືພະລັງງານແຫ່ງທຳອິດຢູ່ແຂວງຈ່ຽງຊູ່ ໂດຍຖືຊາວກະສິກອນເປັນກໍາລັງຕົ້ນຕໍໃນການເລັ່ງລັດຊຸກຍູ້ການບຸກເບີກ ແລະ ດໍາເນີນໂຄງການພະລັງງານໃໝ່ ເຊັ່ນ: ການຜະລິດໄຟຟ້າດ້ວຍແສງຕາເວັນໃນບ້ານ, ເຮັດໃຫ້ຊັບພະຍາກອນກາຍເປັນຊັບສິນ ແລະ ຊັບສິນສ້າງຜົນກຳໄລ, ເຮັດໃຫ້ອຸດສາຫະກຳພະລັງງານໃໝ່ ກາຍເປັນສິ່ງຕາບຈູນທີ່ສຳຄັນໃຫ້ເສດຖະກິດລວມໝູ່ຂອງບ້ານ ແລະ ເປັນຊ່ອງທາງສຳຄັນໃນການເພີ່ມລາຍໄດ້ໃຫ້ກັບຊາວກະສິກອນ.

ຫຼັງຈາກໂຄງການດັ່ງກ່າວສ້າງສຳເລັດແລ້ວ, ຊາວບ້ານຍັງຈະໄດ້ຮັບຄ່າໃຊ້ຈ່າຍການພັດທະນາ 1 ລ້ານກວ່າຢວນ ແລະ ຍັງຈະໄດ້ຄ່າເຊົ່າແຜ່ນຜະລິດໄຟຟ້າດ້ວຍແສງຕາເວັນຕາມເວລາກຳນົດ ເຊິ່ງເໝືອນດັ່ງໄດ້ເປີດບັນຊີທະນາຄານດ້ວຍແສງຕາເວັນໃຫ້ຊາວບ້ານເລີຍ.

ຄຽງຄູ່ກັບການດຳເນີນໂຄງການຜະລິດໄຟຟ້າດ້ວຍແສງຕາເວັນໃນທົ່ວບ້ານຢ່າງຕໍ່ເນື່ອງ, ການບົວລະບັດຮັກສາທີ່ກ່ຽວຂ້ອງໄດ້ຄ່ອຍໆກາຍເປັນຕະຫຼາດໃໝ່. ສະຫະກອນຮ່ວມມືໄດ້ໃຫ້ບຸລິມະສິດແກ່ຊາວບ້ານຢຽນຈ່ຽງ ເພື່ອເຂົ້າຮ່ວມໃນການອົບຮົມ ແລະ ກວດກາ. ພ້ອມກັນນັ້ນຍັງຕັ້ງໜ້າເປີດກວ້າງວຽກງານດັ່ງກ່າວໄປຍັງເຂດອ້ອມຂ້າງ ແລະ ທົ່ວເມືອງ ເພື່ອຊ່ວຍໃຫ້ຊາວບ້ານສາມາດປະກອບອາຊີບຢູ່ໃກ້ເຮືອນ ແລະ ອອກແຮງສ້າງຄວາມຮັ່ງມີແກ່ຕົນເອງ.

.md_Laos_page01 .md_hd{width:300px;}

ຄໍລຳ