ເດັກຊາຍທີ່ເຄີຍເວົ້າອວດໃນຍາມອາຍຸ 10 ປີ ບັດນີ້ໄດ້ບຸກທະລຸສະຖິຕິໂລກນໍາອີກ

cri2024-08-20 10:18:27

ວັນທີ 31 ກໍລະກົດແລ້ວນີ້, ໃນການແຂ່ງຂັນລອຍນ້ຳຟຣີສະໄຕ 100 ແມັດຊາຍຂອງງານກິລາໂອລິມປິກປາຣີ, ທ້າວ ພ່ານຈັນເລີ້ ນັກກິລາຈີນໄດ້ບຸກທະລຸສະຖິຕິໂລກທີ່ຕົນເອງເຄີຍສ້າງຂຶ້ນມາ ແລ້ວໄດ້ຮັບຫຼຽນຄຳດ້ວຍເວລາ 46 ວິນາທີ 40 ລິບດາ. ນີ້ແມ່ນຫຼຽນຄຳຫຼຽນທຳອິດໃນລາຍການລອຍນ້ຳຟຣີສະໄຕຊາຍຂອງງານກິລາໂອລິມປິກໃນປະຫວັດສາດກິລາລອຍນ້ຳຂອງຈີນ.

ຫຼັງການແຂ່ງຂັນ, ທ້າວ ພ່ານຈັນເລີ້ ໃຫ້ສຳພາດວ່າ: “ມື້ນີ້ ໄດ້ເອົາຊະນະໝົດທຸກຄົນທີ່ເຄີຍດູໝິ່ນພວກເຮົາ! ການທີ່ສາມາດບຸກທະລຸສະຖິຕິໂລກໃນສະທີ່ລອຍຍາກລໍາບາກແບບນີ້ ແມ່ນຍ້ອນຄວາມຫວັງຂອງທຸກຄົນ, ຂ້າພະເຈົ້າສຳຜັດໄດ້ກ່ອນເວລາທີ່ລົງສະ”.

ລາວຍັງໂພສຄຳເຫັນລົງໃນສື່ສັງຄົມອອນລາຍຂອງຕົນວ່າ: “ໃນສະທີ່ມີແຕ່ຜູ້ດຽວ ສາມາດລອຍໄດ້ຢ່າງວ່ອງໄວ, ແຕ່ໃນສະທີ່ມີຫຼາຍຄົນແຂ່ງຂັນ ກໍແຮ່ງສາມາດລອຍໄດ້ໄວຂຶ້ນ! ຫຼຽນຄຳຂອງຂ້າພະເຈົ້າຫຼຽນນີ້ ຈະມອບໃຫ້ປະເທດຊາດທີ່ຍິ່ງໃຫຍ່”.

ຊາວເນັດຈຳນວນຫຼວງຫຼາຍພາກັນຍົກຍ້ອງລາວວ່າ: “ຄວາມກ້າຫານ ແລະ ເດັດດ່ຽວໜຽວແໜ້ນແບບນີ້ ຈຶ່ງແມ່ນນ້ຳໃຈນັກກິລາ ແລະ ເຄັດລັບໃນການເອົາຊະນະ. ພ່ານຈັນເລີ້ເກັ່ງຫຼາຍ!”

ພ່ານຈັນເລີ້ ເກີດຢູ່ນະຄອນເວີ່ນໂຈ່ວ, ແຂວງເຈີ້ຈ່ຽງ ໃນວັນທີ 4 ສິງຫາ 2004.

ປີ 2008, ພ່ານຈັນເລີ້ ມີອາຍຸ 4 ປີ ຍັງຮຽນຢູ່ໃນໂຮງຮຽນອະນຸບານ, ຍ້ອນຄຸນນະພາບຮ່າງກາຍທີ່ແຂງແຮງດີ, ລາວຖືກຄັດເລືອກເຂົ້າໃນຫ້ອງເດັກລອຍນໍ້າເກັ່ງຂອງໂຮງຮຽນລອຍນ້ຳເຍົາວະຊົນນະຄອນເວີ່ນໂຈ່ວ, ພາຍຫຼັງມາ ໄດ້ຖືກຄັດເລືອກເຂົ້າໂຮງຮຽນກິລາເວີ່ນໂຈ່ວ ດ້ວຍຄະແນນລອຍນ້ຳທີ່ດີເດັ່ນ.

ພ່ານຈັນເລີ້ ມັກລອຍນ້ຳຫຼາຍດ ແຕ່ໃນເວລາທີ່ຄວາມໄວ ແລະ ເຕັກນິກການລອຍຂອງລາວບໍ່ເປັນໄປຕາມມາດຕະຖານການເຝິກ, ຄູເຝິກກໍບໍ່ໃຫ້ລາວລອຍ ແລະ ໃຫ້ລາວຢືນເບິ່ງຜູ້ອື່ນລອຍຢູ່ຂອບສະ. ຢ່າງໃດກໍຕາມ, ບໍ່ດົນລາວກໍລົງສະອີກ ດ້ວຍຄວາມຄຶດທີ່ຈະພະຍາຍາມຢ່າງແຮງກ້າ ແລະ ສຸດທ້າຍລາວກໍບັນລຸມາດຕະຖານການເຝິກນັບແຕ່ນັ້ນມາ.

ພ່ານຈັນເລີ້ ມີພອນສະຫວັນໃນການລອຍນ້ຳຫຼາຍ ທັງມີຄວາມເຂົ້າໃຈໄວຕໍ່ການລອຍນ້ຳ. ຍາມຍັງນ້ອຍ ລາວເປັນຄົນທີ່ບໍ່ມັກປາກ ແຕ່ດຸໝັ່ນຮຽນ ແລະ ເຝິກລອຍນ້ຳມາຕະຫຼອດ. ໃນງານກິລານະຄອນເວີ່ນໂຈ່ວປີ 2013 ແລະ ງານກິລາແຂວງເຈີ້ຈ່ຽງປີ 2014, ພ່ານຈັນເລີ້ກໍເລີ່ມຄວ້າແຊັມໃນທຸກລາຍການແລ້ວ. ສຳລັບຫຼຽນໄຊທຸກຫຼຽນທີ່ລາວໄດ້ຮັບຫຼັງຈາກງານກິລາແຫ່ງຊາດປີ 2023 ລ້ວນແຕ່ຖືກປູ່ເອົາໄປແຂວນໃສ່ມຸ້ງຂອງລາວ. ປູ່ຂອງ ພ່ານຈັນເລີ້ ເວົ້າດ້ວຍພູມໃຈຕໍ່ເລື່ອງນີ້ວ່າ: “ເມື່ອຕື່ນຂຶ້ນມາໃນຕອນເຊົ້າ ໄດ້ເຫັນຫຼຽນໄຊຢ່າງມາກມາຍແລ້ວ, ຄວາມອຸກໃຈກໍຫາຍໄປໝົດ”.

ເມື່ອຫວນຄືນເຖິງຂະບວນການເຝິກແອບລອຍນ້ຳຂອງ ພ່ານຈັນເລີ້ ແມ່ນບໍ່ມີເຄັດລັບຫຍັງເລີຍ ນອກຈາກຄວາມພະຍາຍາມຢ່າງດຽວ. ຫຼັງຈາກງານເອຊຽນເກມຮາງໂຈ່ວປີ 2023, ມີມື້ໜຶ່ງທີ່ ພ່ານຈັນເລີ້ ກິນເຂົ້າຢູ່ເຮືອນຄູເຝິກ, ລາວເຄີຍອອກປາກວ່າ: ໃນງານກິລາໂອລິມປິກປາຣີ 2024, ລາວຢາກໄດ້ຄະແນນບໍ່ເຖິງ 46 ວິນາທີ 50 ລິບດາ. ເທື່ອນີ້ ລາວເຮັດໄດ້ແລ້ວ.

.md_Laos_page01 .md_hd{width:300px;}

ຄໍລຳ