ການສ້າງທຸລະກິດຢູ່ເດີ່ນບ້ານ ໄດ້ຊຸກຍູ້ການພັດທະນາຊົນນະບົດໃຫ້ຈະເລີນ

cri2024-07-31 15:07:25

ເດີ່ນບ້ານນ້ອຍໆ ແມ່ນດິນເປົ່າຫວ່າງທີ່ໃກ້ກັບເຮືອນ, ເມື່ອປັບປຸງແລ້ວ ກໍສາມາດກາຍເປັນແຫຼ່ງ “ສ້າງຄວາມຮັ່ງມີ” ໃຫ້ຊາວກະສິກອນໄດ້. ການສ້າງທຸລະກິດຢູ່ໃນເດີ່ນບ້ານ ໄດ້ກາຍເປັນຮູບແບບໃໝ່ໃນຊົນນະບົດຂອງຈີນ. ມາເບິ່ງນຳກັນວ່າ ຊາວກະສິກອນຈີນນຳໃຊ້ເດີ່ນບ້ານໃຫ້ເກີດປະສິດທິຜົນສູງຄືແນວໃດ.

ທ້າວ ມາເຂີນ ແມ່ນຊາວກະສິກອນເຂດຊິ່ນຈ່ຽງ, ຢູ່ເດີ່ນບ້ານຂອງລາວໄດ້ປູຫຜັກ 10 ກວ່າຊະນິດ ເຊັ່ນ: ໝາກເຂືອ, ໝາກເຜັດ, ໝາກເລັ່ນ ແລະ ໝາກແຕງເປັນຕົ້ນ, ລາວຮູ້ສຶກພາກພູມໃຈຕໍ່ຜົນງານຂອງຕົນຫຼາຍ, ລາວເວົ້າວ່າ: ແຕ່ກີ້, ຄັນຢາກກິນຜັກກິນໝາກໄມ້ກໍຕ້ອງໄປຊື້ຢູ່ຕະຫຼາດ, ຕອນນີ້, ຂ້າພະເຈົ້າໄດ້ປູກຜັກຫຼາຍຢ່າງຢູ່ເດີ່ນບ້ານ ແລະ ດິນເປົ່າຫວ່າງຢູ່ຂ້າງບ້ານ, ບໍ່ພຽງແຕ່ສາມາດກຸ້ມກິນເທົ່ານັ້ນ, ກິນບໍ່ໝົດກໍຍັງສາມາດເອົາໄປຂາຍນຳອີກ. ການປູກຜັກຢູ່ເດີ່ນບ້ານ ບໍ່ພຽງແຕ່ເສີມຄວາມສວຍງາມໃຫ້ແກ່ບ້ານເທົ່ານັ້ນ ຍັງສາມາດເພີ່ມລາຍໄດ້ນຳອີກ. ເດີ່ນບ້ານຂອງຂ້າພະເຈົ້າບໍ່ໄດ້ໃຫຍ່ ແຕ່ມັນສ້າງຜົນໄດ້ຫຼາຍ.

ຊຸມປີມໍ່ໆມານີ້, ຊາວກະສິກອນຢູ່ແຫ່ງຕ່າງໆຂອງຈີນໄດ້ນຳໃຊ້ເດີ່ນ ຫຼື ດິນເປົ່າຫວ່າງຢູ່ໜ້າບ້ານຫຼັງບ້ານໃຫ້ເປັນປະໂຫຍດ, ປູກພືດເສດຖະກິດທີ່ເຫັນຜົນໄວ ແລະ ຂາຍດີ ຊະນິດຕ່າງໆ ເຊັ່ນ: ສາລີ, ໝາກເຜັດ, ໝາກຖົ່ວເຫຼືອງ ແລະອື່ນໆ. ຫຼືວ່າຕົບແຕ່ງດິນເປົ່າຫວ່າງ ຫຼື ເຮືອນຢູ່ໃຫ້ສວຍງາມ ກາຍເປັນ “ແຫຼ່ງທ່ອງທ່ຽວ”, ຊຸກຍູ້ການພັດທະນາການທ່ອງທ່ຽວຊົນນະບົດ ແລະ ສ້າງລາຍໄດ້ຈາກການທ່ອງທ່ຽວ.

ນອກຈາກຂະແໜງການປູກຝັງ ແລະ ທ່ອງທ່ຽວທີ່ມີເອກະລັກພິເສດແລ້ວ, ເສດຖະກິດເດີ່ນບ້ານຍັງລວມມີຂະແໜງການຫັດຖະກຳ ແລະ ຂະແໜງການບໍລິການ ເປັນຕົ້ນ ເຊິ່ງໄດ້ເປີດກວ້າງຊ່ອງທາງສ້າງລາຍໄດ້ໃຫ້ຊາວກະສິກອນຢ່າງບັງເກີດຜົນ.