ທ່ານຫຼີສຽງ ພົບປະກັບນາຍົກລັດຖະມົນຕີກຳປູເຈຍ

ວັນທີ 10 ຕຸລານີ້, ທ່ານຫຼີສຽງ ນາຍົກລັດຖະມົນຕີຈີນໄດ້ພົບປະກັບສົມເດັດ ຮຸນ ມາແນດ ນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍໃນໄລຍະເຂົ້າຮ່ວມບັນດາກອງປະຊຸມຜູ້ນຳອາຊີຕາເວັນອອກຢູ່ນະຄອນຫຼວງວຽງຈັນ.

ທ່ານ ຫຼີສຽງ ກ່າວວ່າ, ຈີນ ແລະກຳປູເຈຍ ແມ່ນເພື່ອນມິດທີ່ຊ່ວຍເຫຼືອເຊິ່ງກັນແລະກັນແລະຮ່ວມຊາຕາກຳດຽວກັນ. ພາຍໃຕ້ການຊີ້ນຳທາງຍຸດທະສາດຂອງທ່ານປະທານສີຈິ້ນຜິງແລະການນຳຝ່າຍກຳປູເຈຍ, ຄູ່ຮ່ວມຊາຕາກຳມຈີນ-ກຳປູເຈຍໄດ້ກ້າວເຂົ້າສູ່ຍຸກໃໝ່ທີ່ມີຄຸນນະພາບສູງ, ມີລະດັບສູງ ແລະມີມາດຕະຖານສູງ. ຈີນຈະສືບຕໍ່ສະໜັບສະໜູນກຳປູເຈຍຢ່າງເດັດດ່ຽວໃນການເດີນຕາມເສັ້ນທາງພັດທະນາທີ່ເໝາະສົມກັບສະພາບແຫ່ງຊາດຂອງຕົນ, ສະໜັບສະໜູນກຳປູເຈຍຢ່າງເດັດດ່ຽວໃນການປົກປັກຮັກສາອະທິປະໄຕແລະເປັນເຈົ້າຕົນເອງດ້ານຍຸດທະສາດ, ຍິນດີຮ່ວມກັບກຳປູເຈຍສືບທອດມິດຕະພາບອັນເປັນມູນເຊື້ອ, ລົງເລິກຄວາມໄວ້ເນື້ອເຊື່ອໃຈເຊິ່ງກັນແລະກັນທາງຍຸດທະສາດ,ຊຸກຍູ້ການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ສືບຕໍ່ເສີມສ້າງຂອບການຮ່ວມມື "ເພັດ 6 ດ້ານ" ຈີນ-ກຳປູເຈຍ ເພື່ອຊຸກຍູ້ການກໍ່ສ້າງຄູ່ຮ່ວມຊາຕາກຳຈີນ-ກຳປູເຈຍໃນຍຸກໃໝ່ໃຫ້ເລິກເຊິ່ງແລະແໜ້ນແຟ້ນແລະບັນລຸໄດ້ໝາກຜົນຫຼາຍກວ່າເກົ່າ.

ທ່ານ ຫຼີສຽງ ຊີ້ອອກວ່າ, ຈີນຍິນດີຮ່ວມກັບກຳປູເຈຍປິ່ນອ້ອມຄວາມຕ້ອງການດ້ານການພັດທະນາຢ່າງໃກ້ຊິດ, ເລັ່ງລັດຊຸກຍູ້ການເຊື່ອມໂຍງຂໍ້ລິເລີ່ມກ່ຽວກັບການຮ່ວມກັນສ້າງ "ໜຶ່ງແລວໜຶ່ງເສັ້ນທາງ" ກັບ "ຍຸດທະສາດ 5 ແຈ"ຂອງກຳປູເຈຍ,ຮ່ວມກັນຈັດຕັ້ງປະຕິບັດແຜນການດຳເນີນງານຄູ່ຮ່ວມຊາຕາກຳ-ກຳປູເຈຍສະບັບໃໝ່ໃຫ້ປາກົດຜົນເປັນຈິງ.ເສີມຂະຫຍາຍບົດບາດຂອງກົນໄກຄະນະກຳມະການປະສານງານລະຫວ່າງລັດຖະບານສອງປະເທດ, ສ້າງໂຄງການທີ່ມີຄຸນນະພາບສູງໃຫ້ຫຼາຍກວ່າເກົ່າດ້ວຍການຮ່ວມມືທີ່ຕິດແທດຕົວຈິງເພື່ອບັນລຸຜົນປະໂຫຍດຂອງສອງປະເທດໃຫ້ດີຂຶ້ນກວ່າເກົ່າ. ສອງຝ່າຍຄວນເລັ່ງລັດການສ້າງແຜນການຮ່ວມມື "ແລວພັດທະນາອຸດສາຫະກຳ",ເລັ່ງລັດດຳເນີນວຽກງານໄລຍະເບື້ອງຕົ້ນຂອງທາງລົດໄຟຈີນ-ກຳປູເຈຍ, ຕັ້ງໜ້າຊຸກຍູ້ການກໍ່ສ້າງ"ແລວທາງປາແລະເຂົ້າ",ເພີ່ມທະວີການຮ່ວມມືດ້ານພື້ນຖານໂຄງລ່າງ,ພະລັງງານແລະຂົງເຂດອື່ນໆ, ຊຸກຍູ້ໃຫ້ໄດ້ຮັບຜົນສຳເລັດທີ່ເຫັນໄດ້ຊັດເຈນ. ຈີນສົ່ງເສີມໃຫ້ບໍລິສັດຈີນລົງທຶນແລະດຳເນີນທຸລະກິດຢູ່ກຳປູເຈຍຫຼາຍຂຶ້ນ, ແລະຍິນດີນຳເຂົ້າຜະລິດຕະພັນກຳສິກຳທີ່ມີຄຸນນະພາບສູງຈາກກຳປູເຈຍຫຼາຍຂຶ້ນຕື່ມອີກ. ຈີນຍິນດີເພີ່ມທະວີການປະສານງານແລະການປະສານສົມທົບຫຼາຍຝ່າຍກັບກຳປູເຈຍເພື່ອປົກປັກຮັກສາຜົນປະໂຫຍດຮ່ວມດ້ານຍຸດທະສາດໃຫ້ດີ.

ສົມເດັດ ຮຸນ ມາແນດ ກ່າວວ່າ: ການພົວພັນມິດຕະພາບທີ່ເປັນມູນເຊື້ອລະຫວ່າງກຳປູເຈຍກັບຈີນໄດ້ຮັບການສ້າງໂດຍການນຳລຸ້ນເກົ່າຂອງສອງປະເທດ. ໃນຊຸມປີມໍ່ໆມານີ້, ພາຍໃຕ້ການນຳພາຂອງທ່ານປະທານ ສີຈິ້ນຜິງ ແລະ ການນຳກຳປູເຈຍ, ການພົວພັນລະຫວ່າງສອງປະເທດໄດ້ກ້າວເຂົ້າສູ່ຍຸກໃໝ່ແຫ່ງການສ້າງຄູ່ຮ່ວມຊາຕາກຳ ກຳປູເຈຍ-ຈີນ. ຂອບໃຈຝ່າຍຈີນທີ່ໄດ້ໃຫ້ການສະໜັບສະໜູນອັນລ້ຳຄ່າເປັນເວລາຍາວນານຕໍ່ການພັດທະນາເສດຖະກິດແລະສັງຄົມຂອງກຳປູເຈຍ. ກຳປູເຈຍຍຶດໝັ້ນປະຕິບັດນະໂຍບາຍມິດຕະພາບຕໍ່ຈີນ, ຍຶດໝັ້ນຫຼັກການຈີນດຽວ, ແລະຍຶດໝັ້ນວ່າ ວຽກງານໄຕ້ຫວັນ, ຕິເບດ, ຊິນຈຽງ, ຮົງກົງແມ່ນວຽກງານພາຍໃນຂອງຈີນ. ກຳປູເຈຍຍິນດີປະຕິບັດຂອບການຮ່ວມມື "ເພັດ 6 ດ້ານ" ລະຫວ່າງກຳປູເຈຍກັບຈີນ, ຊຸກຍູ້ການຮ່ວມມືໃນ "ແລວພັດທະນາອຸດສາຫະກຳ" ແລະ "ແລວປາແລະເຂົ້າ", ສືບຕໍ່ລົງເລິກການຮ່ວມມືດ້ານກະສິກຳ, ພະລັງງານ, ການລົງທຶນ, ກໍ່ສ້າງພື້ນຖານໂຄງລ່າງ. ດ້ານວັດທະນະທຳ, ການທ່ອງທ່ຽວ ແລະ ຂົງເຂດອື່ນໆ, ເພີ່ມທະວີການຮ່ວມມືດ້ານການປະຕິບັດກົດໝາຍ ແລະ ຄວາມໝັ້ນຄົງ, ຮ່ວມມືຕ້ານການເຄື່ອນໄຫວອາດຊະຍາກຳຂ້າມຊາດ ເຊັ່ນ:ການພະນັນທາງອິນເຕີເນັດແລະການສໍ້ໂກງທາງເອເລັກໂຕນິກ, ຮ່ວມກັນຊຸກຍູ້ການກໍ່ສ້າງຄູ່ຮ່ວມກຳປູເຈຍ-ຈີນ.

.md_Laos_page01 .md_hd{width:300px;}

ຄໍລຳ

ຮູບພາບ

ວີດີໂອ

ເຂດບໍລິຫານພິເສດມາກາວຂອງຈີນສະເຫຼີມສະຫຼອງ ສປ ຈີນສະຖາປະນາຂຶ້ນຄົບຮອບ 75 ປີ