ທາງລົດໄຟຈີນ-ລາວຊຸກຍູ້ການສ້າງຄວາມມີຊີວິດຊີວາໃຫ້ແກ່ຕະຫຼາດການທ່ອງທ່ຽວຂອງລາວຢ່າງຕໍ່ເນື່ອງ

ມາຮອດວັນທີ 9 ພະຈິກນີ້, ສະຖານີຫຼວງພະບາງຂອງສາຍທາງລົດໄຟຈີນ-ລາວມີຜູ້ໂດຍສານຜ່ານເຂົ້າ-ອອກບັນລຸຫຼາຍກວ່າ 1 ລ້ານເທື່ອຄົນ, ເພີ່ມຂຶ້ນ 51% ເມື່ອທຽບໃສ່ໄລຍະດຽວກັນຂອງປີກາຍ, ນັກທ່ອງທ່ຽວທີ່ເລືອກຂີ່ລົດໄຟຈີນ-ລາວໄປທ່ຽວຫຼວງພະບາງມີນັບມື້ນັບຫຼາຍຂຶ້ນ.

ໃນຖານະເປັນເມືອງທ່ອງທ່ຽວທີ່ໄດ້ຮັບຄວາມນິຍົມທີ່ສຸດຢູ່ປະເທດລາວ, ນະຄອນຫຼວງພະບາງມີຊັບພະຍາກອນທ່ອງທ່ຽວທີ່ອຸດົມສົມບູນ. ພາຍຫຼັງທາງລົດໄຟຈີນ-ລາວເປີດນຳໃຊ້, ນັກທ່ອງທ່ຽວທີ່ເລືອກຂີ່ລົດໄຟຈີນ-ລາວໄປທ່ຽວຫຼວງພະບາງກໍນັບມື້ນັບຫຼາຍຂຶ້ນ ເພື່ອມາສຳຜັດກັບມົນສະເໜ່ພິເສດຂອງເມືອງເກົ່າແກ່ແຫ່ງນີ້. ອີງຕາມຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ໃນຈຳນວນຜູ້ໂດຍສານທີ່ເດີນທາງຈາກນະຄອນຫຼວງວຽງຈັນໄປນະຄອນຫຼວງພະບາງ, 85% ແມ່ນເລືອກຂີ່ລົດໄຟ.

ນັບແຕ່ເປີດນຳໃຊ້ທາງລົດໄຟຈີນ-ລາວເປັນຕົ້ນມາ, ພາກສ່ວນທາງລົດໄຟໄດ້ປັບປຸງແຜນການຂົນສົ່ງໃຫ້ດີຂຶ້ນຢ່າງບໍ່ຢຸດຢັ້ງ ໂດຍສະເພາະແມ່ນໄດ້ເພີ່ມຂະບວນລົດໄຟໂດຍສານສາກົນລະຫວ່າງສິບສອງພັ່ນນາຂອງຈີນກັບຫຼວງພະບາງຂອງລາວ ເຊິ່ງເປັນເມືອງທ່ອງທ່ຽວສອງແຫ່ງທີ່ມີຊື່ສຽງທີ່ສຸດ. ຜູ້ໂດຍສານສາມາດຂີ່ລົດໄຟໄປ-ກັບລະຫວ່າງສອງເມືອງດັ່ງກ່າວພາຍໃນມື້ດຽວ ເຊິ່ງໄດ້ສະໜອງການບໍລິການດ້ານການເດີນທາງທີ່ສະດວກສະບາຍ. ປັດຈຸບັນ, ນັກທ່ອງທ່ຽວຕ່າງປະເທດທີ່ຂີ່ລົດໄຟເຂົ້າມາທ່ຽວປະເທດລາວກໍນັບມື້ນັບຫຼາຍຂຶ້ນເຊັ່ນກັນ ຖືເປັນພະລັງຂັບເຄື່ອນອັນແຂງແຮງທີ່ຊຸກຍູ້ຕະຫຼາດການທ່ອງທ່ຽວຂອງລາວຢ່າງຕໍ່ເນື່ອງ.

ອີງຕາມຂໍ້ມູນສະແດງໃຫ້ເຫັນວ່າ: ນັບມາຮອດວັນທີ 31 ຕຸລາ 2024, ທາງລົດໄຟຈີນ-ລາວໄດ້ໃຫ້ບໍລິການຜູ້ໂດຍສານລວມທັງໝົດ 41,5 ລ້ານເທື່ອຄົນ. ມີຜູ້ໂດຍສານຈຳນວນ 3 ແສນເທື່ອຄົນທີ່ມາຈາກ 100 ກວ່າປະເທດ ແລະ ເຂດແຄວ້ນໄດ້ບັນລຸການທ່ອງທ່ຽວຂ້າມຊາດໂດຍຜ່ານທາງລົດໄຟຈີນ-ລາວ ໂດຍສະເພາະແມ່ນໃນລະຫວ່າງວັນທີ 1 ກຸມພາ ຫາ 20 ຕຸລາປີນີ້ ໄດ້ຂົນສົ່ງຜູ້ໂດຍສານຂ້າມຊາດຫຼາຍກວ່າ 2 ແສນເທື່ອຄົນ. ນັກທ່ອງທ່ຽວດັ່ງກ່າວແມ່ນມາຈາກລາວ, ໄທ, ມາເລເຊຍ ແລະ ປະເທດອື່ນໆ, ໄດ້ຂີ່ລົດໄຟຈີນ-ລາວເດີນທາງໄປທ່ອງທ່ຽວ ແລະ ແລກປ່ຽນດ້ານວັດທະນະທຳຢູ່ນະຄອນຫຼວງພະບາງ, ນະຄອນຫຼວງວຽງຈັນ ແລະ ແຫ່ງຕ່າງໆຂອງລາວ.

ອີງຕາມຜູ້ຮັບຜິດຊອບທີ່ກ່ຽວຂ້ອງແນະນຳໃຫ້ຮູ້ວ່າ: ການເປີດນຳໃຊ້ທາງລົດໄຟຈີນ-ລາວໄດ້ສ້າງຜົນປະໂຫຍດອັນພົ້ນເດັ່ນໃຫ້ແກ່ການທ່ອງທ່ຽວຂອງລາວ. ປັດຈຸບັນ, ມີວິສາຫະກິດທ່ອງທ່ຽວຈີນຫຼາຍກວ່າ 100 ແຫ່ງໄດ້ອອກຜະລິດຕະພັນການທ່ອງທ່ຽວລາວ, ສະພາບການຈອງໂຮງແຮມຢູ່ນະຄອນຫຼວງວຽງຈັນມີຄວາມຄຶກຄັກ, ໂຮງແຮມຕ່າງໆໄດ້ຖືກຈອງໄວ້ຍາວໄປຮອດເດືອນມີນາປີໜ້າ ເຊິ່ງໄດ້ສ່ອງແສງໃຫ້ເຫັນເຖິງບົດບາດຊຸກຍູ້ອັນແຂງແຮງຂອງທາງລົດໄຟຈີນ-ລາວທີ່ມີຕໍ່ຕະຫຼາດການທ່ອງທ່ຽວ.

ໃນຊຸມປີມໍ່ໆມານີ້, ຈີນໄດ້ເປີດປະຕູຕໍ່ພາຍນອກນັບມື້ນັບກວ້າງອອກກວ່າເກົ່າ, “ວີຊາລ້ານຊ້າງ-ແມ່ນ້ຳຂອງ”, ປະເທດທີ່ຍົກເວັ້ນວີຊາເພີ່ມຂຶ້ນເລື້ອຍໆ, ການຍົກເວັ້ນວີຊາໃຫ້ຜູ້ໂດຍສານທີ່ຜ່ານປະເທດຈີນໄປປະເທດທີ 3 ແລະ ພັກເຊົາຢູ່ຈີນບໍ່ເກີນ 144 ຊົ່ວໂມງ ແລະ ມາດຕະການອຳນວຍຄວາມສະດວກອື່ນໆ ໄດ້ເຮັດໃຫ້ນັກທ່ອງທ່ຽວຕ່າງປະເທດທີ່ມາທ່ຽວຈີນເພີ່ມຂຶ້ນຢ່າງວ່ອງໄວ. ນັກທ່ອງທ່ຽວດັ່ງກ່າວກໍສາມາດໄປທ່ຽວປະເທດລາວຢ່າງສະດວກໂດຍຜ່ານທາງລົດໄຟຈີນ-ລາວ.

ປັດຈຸບັນ, ຂະບວນລົດໄຟແຫ່ງໄມຕີຈິດມິດຕະພາບ ແລະ ການພັດທະນາ ພວມແລ່ນເຂົ້າອອກສອງປະເທດຈີນ-ລາວຕາມທາງລົດໄຟຈີນ-ລາວຢ່າງບໍ່ມີມື້ຢຸດພັກ, ນັກທ່ອງທ່ຽວຈີນທີ່ນັບມື້ນັບຫຼາຍມີໂອກາດສຳຜັດກັບຮີດຄອງປະເພນີຂອງລາວ, ນັກທ່ອງທ່ຽວລາວກໍໄດ້ໄປຮັບຮູ້ວັດທະນະທຳ ແລະ ການພັດທະນາຂອງຈີນຢ່າງສະດວກ. ທາງລົດໄຟຈີນ-ລາວໄດ້ກາຍເປັນຂົວຕໍ່ທີ່ເຊື່ອມຕໍ່ໄມຕີຈິດມິດຕະພາບລະຫວ່າງປະຊາຊົນສອງປະເທດ ແລະ ເປັນພະລັງຂັບເຄື່ອນອັນສຳຄັນໃນການຊຸກຍູ້ຄວາມຈະເລີນຮຸ່ງເຮືອງຂອງເສດຖະກິດສອງປະເທດ. ໃນອະນາຄົດ, ທາງລົດໄຟຈີນ-ລາວຈະສືບຕໍ່ສ້າງຄວາມຜາສຸກຫຼາຍກວ່າເກົ່າໃຫ້ແກ່ປະຊາຊົນສອງປະເທດ ແລະ ປະກອບສ່ວນຫຼາຍກວ່າເກົ່າເຂົ້າໃນການສ້າງຄູ່ຮ່ວມຊາຕາກຳຈີນ-ລາວ.

.md_Laos_page01 .md_hd{width:300px;}

ຄໍລຳ

ຮູບພາບ

ວີດີໂອ

ຕົວຢ່າງດິນດວງຈັນທີ່ເກັບໄດ້ດ້ວຍຍານສຳຫຼວດຊາງເອ 6 ສະແດງຢູ່ງານວາງສະແດງການບິນ ແລະ ການບິນອະວະກາດສາກົນຈີນ

ຈັດງານວາງສະແດງການບິນແລະການບິນອະວະກາດສາກົນຈີນຄັ້ງທີ 15

10,000 ຕື້ຢວນ! ຄວາມກົດດັນໃນບັນຫາໜີ້ສິນຂອງອົງການປົກຄອງທ້ອງຖິ່ນຈີນຈະຜ່ອນຄາຍລົງຫຼາຍ

ວິສາຫະກິດຕ່າງປະເທດທີ່ເຂົ້າຮ່ວມCIIE ເປັນສັກຂີພິຍານ ແລະ ຜູ້ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງຈີນ

ການສຳພາດປະທານາທິບໍດີແຟງລັງ

ຜູ້ບໍລິໂພກຂອງຈີນສາມາດສັ່ງຊື້ຜະລິດຕະພັນຂອງລາວໄດ້ຢ່າງສະດວກກວ່າເກົ່າແລ້ວ!

ກ່ຽວກັບ laos.cri.cn |ກ່ຽວກັບ ບໍລິສັດຄວບຄຸມຫຸ້ນສ່ວນສື່ມວນຊົນທົ່ວໂລກກົວກວາງ ຫຼື GMG|ການບໍລິການດ້ານການໂຄສະນາຂາຍສິນຄ້າ|ຕິດຕໍ່ພວກເຮົາ|ສະຫງວນລິຂະສິດ

Copyright © cri.cn All Rights Reserved