ການນຳຂັ້ນສູງຈີນ-ອາຊຽນໄປມາຫາສູ່ກັນເລື້ອຍໆ ຊຸກຍູ້ການເຊື່ອມໂຍງຂອງພາກພື້ນລົງສູ່ລວງເລິກຢ່າງໜັກແໜ້ນ

ນັບແຕ່ເດືອນພະຈິກ 2024 ເປັນຕົ້ນມາ, ການນຳຂັ້ນສູງຂອງຈີນ ແລະ ອາຊຽນມີການໄປມາຫາສູ່ກັນເລື້ອຍໆ. ເມື່ອວັນທີ 4 ຫາ ວັນທີ 7 ພະຈິກນີ້, ທ່ານອານວາ ບິນ ອິບຣາຮິມ ນາຍົກລັດຖະມົນຕີມາເລເຊຍໄດ້ມາຢ້ຽມຢາມຈີນເພື່ອເຮັດວຽກ; ຫຼັງຈາກນັ້ນ, ຜູ້ນຳ 5 ປະເທດຕາມລຳແມ່ນ້ຳຂອງ ຄື: ລາວ ກຳປູເຈຍ ມຽນມາ ໄທ ແລະ ຫວຽດນາມກໍໄດ້ເດີນທາງມາຈີນເພື່ອເຂົ້າຮ່ວມກອງປະຊຸມຜູ້ນຳຄັ້ງທີ 8 ຂອງການຮ່ວມມືເສດຖະກິດອະນຸພາກພື້ນແມ່ນ້ຳຂອງ ຫຼື GMS; ວັນທີ 8 ພະຈິກ, ທ່ານພຣາໂບໂວ ຊຸບຽນໂຕ ປະທານາທິບໍດີຄົນໃໝ່ຂອງອິນໂດເນເຊຍໄດ້ເດີນທາງຢ້ຽມຢາມຈີນເປັນຄັ້ງທຳອິດໃນອາຍຸຕຳແໜ່ງຂອງຕົນ.

ໃນຊຸມປີມໍ່ໆມານີ້, ພາຍໃຕ້ການຊີ້ນຳສູ່ເປົ້າໝາຍຂອງການສ້າງປະຊາຄົມຮ່ວມຊາຕາກຳຈີນ-ອາຊຽນ, ການຮ່ວມມືໃນພາກພື້ນລະຫວ່າງຈີນ-ອາຊຽນໄດ້ເລັ່ງລັດໄວຂຶ້ນ. ວັນທີ 10 ຕຸລາຜ່ານມາ, ໃນໄລຍະທີ່ ເຂົ້າຮ່ວມກອງປະຊຸມສຸດຍອດຈີນ-ອາຊຽນຄັ້ງທີ 27 ຢູ່ນະຄອນຫຼວງວຽງຈັນ, ຜູ້ນຳຈີນ ແລະ ອາຊຽນໄດ້ປະກາດສຳເລັດການເຈລະຈາກ່ຽວກັບການຍົກລະດັບເຂດການຄ້າເສລີຈີນອາຊຽນ 3.0 ໃນດ້ານທາດແທ້ ເຊິ່ງໄດ້ສະໜອງສິ່ງຮັບປະກັນດ້ານລະບຽບການໃຫ້ແກ່ຈີນ ແລະ ອາຊຽນໃນການຮ່ວມກັນສ້າງຕະຫຼາດຂະໜາດໃຫຍ່ພິເສດ, ແລະຈະຊຸກຍູ້ໃຫ້ເສດຖະກິດພາກພື້ນເຊື່ອມໂຍງເຂົ້າກັນ; ໃນກອງປະຊຸມຄັ້ງນີ້, ຝ່າຍຈີນຢືນຢັນວ່າ ຈະເພີ່ມທະວີການຮ່ວມມືກັບອາຊຽນໃນຂົງເຂດອຸດສາຫະກຳໃໝ່. ໃນກອງປະຊຸມຜູ້ນຳຄັ້ງທີ 8 ຂອງກົນໄກການຮ່ວມມືGMS ທີ່ຈັດຂຶ້ນໃນຫວ່າງບໍ່ດົນມານີ້, ຝ່າຍຕ່າງໆທີ່ເຂົ້າຮ່ວມກອງປະຊຸມກ່າວວ່າ ຍິນດີສຸມຄວາມພະຍາຍາມຮ່ວມກັນ, ຊຸກຍູ້ໃຫ້ເສດຖະກິດພາກພື້ນເຊື່ອມໂຍງເຂົ້າກັນ ສ້າງການພັດທະນາແບບກວມລວມ ແລະ ຍືນຍົງຂອງບັນດາປະເທດຢູ່ອະນຸພາກພື້ນແມ່ນ້ຳຂອງ, ພ້ອມທັງຊຸກຍູ້ໃຫ້ການສ້າງປະຊາຄົມຮ່ວມຊາຕາກຳຂອງປະເທດໃນພາກພື້ນລົງສູ່ລວງເລິກຢ່າງບໍ່ຢຸດຢັ້ງ.

ພ້ອມກັນນັ້ນ, ການກໍ່ສ້າງພື້ນຖານໂຄງລ່າງຈີນ-ອາຊຽນໄດ້ກໍ່ຮ່າງສ້າງຖານຂຶ້ນມາຢ່າງໜັກແໜ້ນ. ນັບແຕ່ທາງລົດໄຟຈີນ-ລາວເປີດບໍລິການເປັນຕົ້ນມາ, ນັບມາຮອດວັນທີ 3 ພະຈິກນີ້, ໄດ້ເປີດຂະບວນລົດໄຟໂດຍສານຫຼາຍກວ່າ 6 ໝື່ນຖ້ຽວ, ຂົນສົ່ງຜູ້ໂດຍສານເຖິງ 41,7 ລ້ານເທື່ອຄົນ, ຂົນສົ່ງສິນຄ້າເຖິງ 46,7 ລ້ານໂຕນ, ປະລິມານຂົນສົ່ງສິນຄ້າຂ້າມຊາດມີເຖິງ 10,7 ລ້ານໂຕນ, ທາງລົດໄຟຈີນ-ລາວໄດ້ກາຍເປັນຊຸມທາງຄົມມະນາຄົມທີ່ສຳຄັນລະຫວ່າງຈີນກັບລາວ ກໍຄື ພາກພື້ນອາຊີຕາເວັນອອກສຽງໃຕ້ ເຊິ່ງໄດ້ເພີ່ມພະລັງຂັບເຄື່ອນອັນໃໝ່ໃນການສ້າງຄວາມຈະເລີນຮຸ່ງເຮືອງດ້ານການຄ້າ ແລະ ການພັດທະນາເສດຖະກິດຂອງອະນຸພາກພື້ນແມ່ນ້ຳຂອງ. ນັບແຕ່ທາງລົດໄຟຄວາມໄວສູງຈາກາຕາ-ບັນດຸງຂອງອິນໂດເນເຊຍເປີດບໍລິການຢ່າງເປັນທາງການເປັນເວລາ 1 ປີປາຍຜ່ານມາ, ໄດ້ຂົນສົ່ງຜູ້ໂດຍສານເຖິງ 5,79 ລ້ານເທື່ອຄົນ. ທາງລົດໄຟລຽບຕາມຊາຍຝັ່ງທະເລຕາເວັນອອກຂອງມາເລເຊຍກໍພວມດຳເນີນການກໍ່ສ້າງໄປຢ່າງສະດວກ, ນັບມາຮອດເດືອນກັນຍາ 2024, ໄດ້ສຳເລັດໄປແລ້ວ 72,93%. ໃນເດືອນກໍລະກົດ 2024, ຂະບວນລົດໄຟໂດຍສານຂ້າມຊາດທີ່ເຊື່ອມຕໍ່ລາວ ແລະ ໄທໄດ້ເປີດບໍລິການຢ່າງເປັນທາງການ, ໂຄງການກໍ່ສ້າງທາງລົດໄຟຈີນ-ໄທໄລຍະໜຶ່ງກໍໄດ້ເລັ່ງລັດໄວຂຶ້ນ. ນອກນີ້, ຄາດວ່າທາງລົດໄຟຈີນ-ຫວຽດນາມຈະເລີ່ມກໍ່ສ້າງໃນປີ 2025, ທາງລົດໄຟຈີນ-ກຳປູເຈຍກໍພວມເລັ່ງລັດວຽກງານໄລຍະເບື້ອງຕົ້ນ.

ນອກນີ້, ໂດຍຜ່ານຈາກມາດຕະການອຳນວຍຄວາມສະດວກຕ່າງໆ, ການແລກປ່ຽນ ແລະ ການໄປມາຫາສູ່ກັນລະຫວ່າງປະຊາຊົນຈີນ -ອາຊຽນກໍມີຄວາມໂລ່ງລ່ຽນ ແລະ ສະດວກກວ່າເກົ່າ. ປັດຈຸບັນນີ້, ຈີນ ກັບ ປະເທດສະມາຊິກອາຊຽນຈຳນວນໜຶ່ງ ເຊັ່ນ: ສິງກະໂປ ມາເລເຊຍ ໄທ ແລະອື່ນໆໄດ້ບັນລຸນະໂຍບາຍຜ່ານດ່ານຢ່າງສະດວກໂດຍຍົກເວັ້ນວີຊາຕໍ່ກັນ. ເພື່ອຊຸກຍູ້ຂະບວນການເຊື່ອມໂຍງເສດຖະກິດອະນຸພາກພື້ນແມ່ນ້ຳຂອງໃຫ້ດີກວ່າເກົ່າ, ຈີນຕົກລົງອອກ “ວີຊາແມ່ນ້ຳລ້ານຊ້າງແມ່ນ້ຳຂອງ” ໃຫ້ແກ່ 5 ປະເທດຕາມລຳແມ່ນ້ຳຂອງ, ໂດຍພິຈາລະນາ ແລະ ອອກວີຊາເຂົ້າ-ອອກເມືອງຈີນໄດ້ຫຼາຍເທື່ອພາຍໃນໄລຍະເວລາ 5 ປີໃຫ້ແກ່ຜູ້ດຳເນີນທຸລະກິດທີ່ສອດຄ່ອງກັບເງື່ອນໄຂ. ສິ່ງນີ້ບໍ່ພຽງແຕ່ຈະອຳນວຍຄວາມສະດວກນັບມື້ນັບຫຼາຍຂຶ້ນໃຫ້ແກ່ການໄປມາຫາສູ່ກັນລະຫວ່າງປະຊາຊົນຈີນ-ອາຊຽນເທົ່ານັ້ນ, ແຕ່ຍັງຈະມີຜົນດີຕໍ່ການເພີ່ມທະວີຄວາມປາຖະໜາຂອງປະຊາຊົນຕໍ່ການສະໜັບສະໜູນການຮ່ວມມືໃນພາກພື້ນອີກດ້ວຍ.

ປັດຈຸບັນ, ໂລກໄດ້ເຂົ້າສູ່ໄລຍະການປ່ຽນແປງ ແລະ ປັ່ນປ່ວນຄັ້ງໃໝ່, ແຕ່ການນຳຂັ້ນສູງຈີນ-ອາຊຽນກໍມີການໄປມາຫາສູ່ຢ້ຽມຢາມກັນຢ່າງຖີ່ປານນີ້ ເຊິ່ງໄດ້ສ່ອງແສງໃຫ້ເຫັນເຖິງທ່າອຽງການພັດທະນາຂອງການພົວພັນລະຫວ່າງສອງຝ່າຍພວມນັບມື້ນັບໃກ້ຊິດກວ່າເກົ່າ, ຍິ່ງສະແດງໃຫ້ເຫັນເຖິງຄວາມຕ້ອງການອັນຮີບດ່ວນທີ່ປະເທດໃນພາກພື້ນຢາກຊຸກຍູ້ການຮ່ວມມືໃນພາກພື້ນ. ໃນເວລາພົບປະກັບຜູ້ນຳຈີນ, ທ່ານອານວາ ນາຍົກລັດຖະມົນຕີມາເລເຊຍໄດ້ໃຫ້ຄຳໝັ້ນສັນຍາວ່າ, ປີໜ້າ ມາເລເຊຍຂຶ້ນເປັນປະເທດປະທານໝູນວຽນຂອງອາຊຽນແລ້ວຈະສຸມຄວາມພະຍາຍາມເພື່ອເພີ່ມທະວີການຮ່ວມມືໃນພາກພື້ນ. ກອງປະຊຸມຜູ້ນຳ GMS ກໍໄດ້ເນັ້ນໜັກເຖິງ ຊຸກຍູ້ການພັດທະນາແບບຍືນຍົງຂອງພາກພື້ນ, ພັດທະນາເສດຖະກິດແບບເຊື່ອມໂຍງເຂົ້າກັນ. ໃນເວລາພົບປະກັບທ່ານສີຈິ້ນຜິງ ປະທານປະເທດຈີນ, ທ່ານພຣາໂບໂວ ປະທານາທິບໍດີອິນໂດເນເຊຍກ່າວວ່າ: “ຍິນດີເພີ່ມທະວີການແລກປ່ຽນ ແລະ ປະສານງານກັບຈີນພາຍໃນຂອບຫຼາຍຝ່າຍ, ເຊັ່ນ ກຸ່ມ 20 ປະເທດ ແລະອື່ນໆ, ສຸມຄວາມພະຍາຍາມເພື່ອຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.” ຈາກນີ້ສາມາດເຫັນໄດ້ວ່າ, ການເລັ່ງລັດການຮ່ວມມືໃນພາກພື້ນ, ຊຸກຍູ້ການເຊື່ອມໂຍງຂອງພາກພື້ນໄດ້ກາຍເປັນຄວາມເຫັນທີ່ເປັນເອກະພາບກັນລະຫວ່າງຈີນ ແລະ ປະເທດສະມາຊິກອາຊຽນ. ພວກເຮົາເຊື່ອໝັ້ນວ່າ, ພາຍໃຕ້ສະພາບການໃໝ່ທີ່ຈີນ ແລະ ອາຊຽນສະໜັບສະໜູນການເຊື່ອມໂຍງຂອງພາກພື້ນຢ່າງແຂງແຮງ, ການຮ່ວມມືໃນພາກພື້ນລະຫວ່າງຈີນ ແລະ ອາຊຽນຍັງຈະໄດ້ຮັບຜົນງານຫຼາຍກວ່າເກົ່າ ແລະ ປະກອບສ່ວນອັນຕັ້ງໜ້າຫຼາຍກວ່າເກົ່າເຂົ້າໃນສັນຕິພາບ ຄວາມສະຫງົບ ການພັດທະນາ ແລະ ຄວາມຈະເລີນຮຸ່ງເຮືອງຂອງພາກພື້ນ ກໍຄືຂອງໂລກ.

.md_Laos_page01 .md_hd{width:300px;}

ຄໍລຳ

ຮູບພາບ

ວີດີໂອ

ຈັດງານວາງສະແດງການບິນແລະການບິນອະວະກາດສາກົນຈີນຄັ້ງທີ 15

10,000 ຕື້ຢວນ! ຄວາມກົດດັນໃນບັນຫາໜີ້ສິນຂອງອົງການປົກຄອງທ້ອງຖິ່ນຈີນຈະຜ່ອນຄາຍລົງຫຼາຍ

ມະນຸດເກັບຕົວຢ່າງຢູ່ໜ້າດິນດາວອັງຄານຄັ້ງທຳອິດຈະດຳເນີນຄືແນວໃດ?

ວິສາຫະກິດຕ່າງປະເທດທີ່ເຂົ້າຮ່ວມCIIE ເປັນສັກຂີພິຍານ ແລະ ຜູ້ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງຈີນ

ການສຳພາດປະທານາທິບໍດີແຟງລັງ

ຜູ້ບໍລິໂພກຂອງຈີນສາມາດສັ່ງຊື້ຜະລິດຕະພັນຂອງລາວໄດ້ຢ່າງສະດວກກວ່າເກົ່າແລ້ວ!

ກ່ຽວກັບ laos.cri.cn |ກ່ຽວກັບ ບໍລິສັດຄວບຄຸມຫຸ້ນສ່ວນສື່ມວນຊົນທົ່ວໂລກກົວກວາງ ຫຼື GMG|ການບໍລິການດ້ານການໂຄສະນາຂາຍສິນຄ້າ|ຕິດຕໍ່ພວກເຮົາ|ສະຫງວນລິຂະສິດ

Copyright © cri.cn All Rights Reserved