ກອງປະຊຸມສຸດຍອດອາຊຽນຈັດຂຶ້ນອີກຄັ້ງໂດຍສຸມໃສ່ການພັດທະນາມາໂດຍຕະຫຼອດ

CRI2024-10-09 17:31:58

ວັນທີ 8 ຕຸລານີ້, ກອງປະຊຸມຍຸດຍອດອາຊຽນຄັ້ງທີ 44 ໄດ້ຈັດຂຶ້ນຢູ່ນະຄອນຫຼວງວຽງຈັນ. ໃນຖານະເປັນເຈົ້າພາບ, ໃນເວລາຮັບໜ້າທີ່ເປັນປະເທດປະທານໝູນວຽນຂອງອາຊຽນໃນປີ 2023 ຜ່ານມາ, ປະເທດລາວກໍໄດ້ກຳນົດຄຳຂວັນປະຈຳປີ 2024 ຂອງອາຊຽນວ່າ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”.

ຄຳຂວັນປະຈຳປີຂອງອາຊຽນໄດ້ສະແດງໃຫ້ເຫັນເຖິງຄວາມພະຍາຍາມຂອງປະເທດປະທານໝູນວຽນຂອງອາຊຽນເພື່ອຊຸກຍູ້ການເຊື່ອມໂຍງເຂົ້າກັນ ແລະ ການສ້າງປະຊາຄົມອາຊຽນ, ເຊິ່ງສະແດງໃຫ້ເຫັນເຖິງຄວາມສົນໃຈຮ່ວມຂອງປະເທດສະມາຊິກອາຊຽນໃນດ້ານລວມ. ຕົວຢ່າງວ່າ ພາຍໃຕ້ຄຳຂວັນປະຈຳປີ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”ຂອງປີ 2024 ນີ້, ປະເທດລາວໄດ້ສະເໜີ 9 ຂົງເຂດບຸລິມະສິດ , ໃນນັ້ນລວມທັງ 4 ຂົງເຂດແຫ່ງການເພີ່ມທະວີການເຊື່ອມຈອດກັນ ຄື: ການເຊື່ອມໂຍງເຊື່ອມຈອດເສດຖະກິດ, ສ້າງອະນາຄົດແບບກວມລວມ ແລະ ຍືນຍົງ, ຫັນປ່ຽນຮູບແບບໄປສູ່ອະນາຄົດແຫ່ງດິຈີຕອນ, ເສີມຂະຫຍາຍວັດທະນະທຳ - ສິລະປະຂອງອາຊຽນ ແລະ ເສີມຂະຫຍາຍບົດບາດໃນການພັດທະນາແບບກວມລວມ ແລະ ຍືນຍົງ; ນອກນັ້ນຍັງມີ 5 ຂົງເຂດທີ່ເສີມສ້າງຂີດຄວາມສາມາດແຫ່ງການຟື້ນຟູ, ຄື: ກຳນົດແຜນຍຸດທະສາດເພື່ອຈັດຕັ້ງປະຕິບັດ “ວິໄສທັດປະຊາຄົມອາຊຽນ 2045”, ເພີ່ມທະວີຖານະບົດບາດໃຈກາງຂອງອາຊຽນໃນພາກພື້ນ, ຊຸກຍູ້ການຮ່ວມມືດ້ານການອະນຸລັກສິ່ງແວດລ້ອມ, ຊຸກຍູ້ການພັດທະນາພາລະກິດແມ່ ແລະ ເດັກ, ຊຸກຍູ້ການພັດທະນາວຽກງານສາທາລະນະສຸກ. ນີ້ໄດ້ສະແດງໃຫ້ເຫັນຄວາມປາດຖະໜາທີ່ເປັນເອກະພາບກັນຂອງປະເທດສະມາຊິກອາຊຽນເພື່ອຟື້ນຟູເສດຖະກິດ ຮັບມືກັບບັນຫາດ້ານເສດຖະກິດ ບັນຫາດ້ານຄວາມໝັ້ນຄົງແບບເກົ່າ ແລະ ແບບໃໝ່ພາຍໃຕ້ການປ່ຽນແປງອັນຟົດເດືອດຂອງສະຖານະການສາກົນ ແລະ ພາກພື້ນ.

ຄຳຂວັນປະຈຳປີ 2024 ຂອງອາຊຽນໄດ້ສືບທອດ ແລະເສີມຂະຫຍາຍຄຳຂວັນປະຈຳປີຂອງອາຊຽນໃນຫຼາຍປີຜ່ານມາ. ໂດຍຜ່ານຄຳຂວັນປະຈຳປີເຫຼົ່ານີ້, ສາມາດເຫັນຄວາມພະຍາຍາມຢ່າງບໍ່ລົດລະຂອງອາຊຽນໃນວຽກງານບຸລິມະນຸດເພື່ອພັດທະນາພາກພື້ນ ແລະ ຂົງເຂດການຮ່ວມມືທີ່ສຳຄັນ ເຊິ່ງສາມາດສະຫຼຸບເປັນ 2 ຂໍ້ຫຼັກ: ໜຶ່ງ, ສະຖານະການຂອງພາກພື້ນ ແລະ ໂລກໄດ້ເກີດການປ່ຽນແປງຢ່າງວ່ອງໄວ, ການປະຕິວັດວິທະຍາສາດເຕັກໂນໂລຊີຮອບໃໝ່ໄດ້ແຜ່ຂະຫຍາຍໃນທົ່ວໂລກ, ອາຊຽນຕ້ອງໄປຕາມກະແສຂອງການການປ່ຽນແປງ, ແລະ ຮັບມືກັບການປ່ຽນແປງດ້ວຍວິທີແບບປະດິດສ້າງໃໝ່; ສອງ, ຄວາມໝັ້ນໜຽວ ແລະຖານະບົດບາດໃຈກາງຂອງອາຊຽນໃນພາກພື້ນເປັນຂໍກຸນແຈສຳຄັນໃນການຮັບມືກັບການປ່ຽນແປງ ແລະ ສິ່ງທ້າທາຍ, ແຕ່ສິ່ງນີ້ຕ້ອງຖືເອົາການພັດທະນາເສດຖະກິດແບບຍືນຍົງເປັນປະຖົມປັດໄຈ, ຈຶ່ງຕ້ອງໃຫ້ອາຊຽນຮ່ວມແຮງຮ່ວມໃຈກັນ, ໃຊ້ວິທີແບບສົມດຸນ ແລະ ປະດິດສ້າງໃໝ່ເພື່ອແກ້ໄຂສາຍພົວພັນກັບປະເທດຄູ່ເຈລະຈາທີ່ສຳຄັນໃຫ້ດີ, ແລ້ວຮັບປະກັນໃຫ້ກຳລັງແຮງຕົ້ນຕໍຂອງອາຊຽນໄດ້ສຸມໃສ່ຫົວຂໍ້ທີ່ກ່ຽວພັນເຖິງການພັດທະນາຢ່າງສະເໝີຕົ້ນສະເໝີປາຍ.

ຈີນ ແລະ ອາຊຽນມີສາຍພົວພັນໄມຕີຈິດມິດຕະພາບມາແຕ່ດົນນານແລ້ວ, ເປັນບ້ານໃກ້ເຮືອນຄຽງທີ່ດີ ເພື່ອນມິດທີ່ດີ ແລະ ຄູ່ຮ່ວມມືທີ່ດີ. ເດືອນຕຸລາປີ 2013, ທ່ານສີຈິ້ນຜິງ ປະທານປະເທດຈີນສະເໜີວ່າ ຍິນດີຮ່ວມມືກັບປະເທດສະມາຊິກອາຊຽນ ເພື່ອຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21, ຮ່ວມກັນສ້າງປະຊາຄົມຮ່ວມຊາຕາກຳຈີນ-ອາຊຽນທີ່ສະໜິດແໜ້ນກວ່າເກົ່າ ເຊິ່ງໄດ້ຮັບການຕອບຮັບທີ່ດີຈາກປະເທດສະມາຊິກອາຊຽນ, ເດືອນພະຈິກປີ 2021, ໃນກອງປະຊຸມສຸດຍອດເພື່ອລະນຶກການສ້າງຕັ້ງສາຍພົວພັນຄູ່ເຈລະຈາຈີນ-ອາຊຽນຄົບຮອບ 30 ປີ, ທ່ານສີຈິ້ນຜິງໄດ້ສະເໜີໃຫ້ສ້າງ ບ້ານເມືອງແຫ່ງສັນຕິພາບ ສະຫງົບສຸກ ຈະເລີນຮຸ່ງເຮືອງ ສວຍງາມ ແລະ ມີໄມຕີຈິດມິດຕະພາບ, ຮ່ວມກັບຜູ້ນຳປະເທດອາຊຽນປະກາດວ່າ ສ້າງສາຍພົວພັນຄູ່ຮ່ວມຍຸດທະສາດຮອບດ້ານ. ໃນຊຸມປີຜ່ານມານີ້, ຈີນ ແລະ ອາຊຽນໄດ້ເກາະແຂນກັນກ້າວໄປຂ້າງໜ້າໂດຍຕະຫຼອດ, ໄດ້ກາຍເປັນແບບຢ່າງທີ່ປະສົບຜົນສຳເລັດຫຼາຍທີ່ສຸດ ແລະ ມີພະລັງຊີວິດຫຼາຍທີ່ສຸດໃນການຮ່ວມມືພາກພື້ນອາຊີປາຊີຟິກ, ເຊິ່ງເປັນແບບຢ່າງທີ່ດີໃນການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.

.md_Laos_page01 .md_hd{width:300px;}

ຄໍລຳ