ທີມການສະແດງການບິນ “ນົກອິນຊີແດງ”ຂອງກອງທັບອາກາດຈີນໄດ້ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 75 ປີ

ຕອນເຊົ້າວັນທີ 17 ມັງກອນນີ້, ກິດຈະກຳສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 75 ປີໄດ້ຈັດຂຶ້ນສະໜາມຊ້ອມຮົບຂອງວິທະຍາຄານນາຍທະຫານບົກກົມມະດຳທີ່ແຂວງວຽງຈັນ. ໂດຍຕອບສະໜອງຕາມຄຳເຊີນຂອງກະຊວງປ້ອງກັນປະເທດລາວ, ທີມການສະແດງການບິນ “ນົກອິນຊີແດງ” ຂອງກອງທັບອາກາດຈີນໄດ້ເຂົ້າຮ່ວມກິດຈະກຳດັ່ງກ່າວ ແລະ ດຳເນີນການສະແດງການບິນ, ນີ້ເປັນຄັ້ງທຳອິດທີ່ທີມການສະແດງການບິນ “ນົກອິນຊີແດງ” ຂອງກອງທັບອາກາດຈີນໄປສະແດງຢູ່ຕ່າງປະເທດ. ໃນການສະແດງດັ່ງກ່າວ, ທີມການສະແດງ“ນົກອິນຊີແດງ” ໄດ້ປ່ອຍສີແດງ, ສີຄາມ ແລະ ສີຂາວ ທີ່ເປັນສີທຸງຊາດລາວເຕັມທ້ອງຟ້າ ພ້ອມດ້ວຍສີຂຽວທີ່ເປັນສັນຍາລັກແຫ່ງສັນຕິພາບ ແລະ ມິດຕະພາບ, ໝາຍຄວາມວ່າມິດຕະພາບລາວ-ຈີນໝັ້ນຍືນ. ຕອນເຊົ້າວັນທີ 18 ມັງກອນນີ້, ທີມການສະແດງ“ນົກອິນຊີແດງ” ໄດ້ບິນຂ້າມຜ່ານບຶງທາດຫຼວງ ເຊິ່ງຊາວນະຄອນຫຼວງວຽງຈັນໄດ້ຮັບຊົມເຖິງຄວາມຍິ່ງໃຫຍ່ອະລັງການຂອງ“ນົກອິນຊີແດງ”.