ການເຂົ້າເປັນສະມາຊິກບຣິກສມີຜົນປະໂຫຍດແນວໃດຕໍ່ປະເທດ “ເຂດໂລກໃຕ້”

CRI2024-10-23 15:27:36

ນັບແຕ່ວັນທີ 22 ຫາ ວັນທີ 24 ຕຸລານີ້, ກອງປະຊຸມພົບປະຄັ້ງທີ 16 ຂອງຜູ້ນຳບຣິກສໄດ້ຈັດຂຶ້ນຢູ່ນະຄອນຄາຊານ ປະເທດຣັດເຊຍ, ນີ້ເປັນກອງປະຊຸມສຸດຍອດຄັ້ງທຳອິດຫຼັງຈາກບຣິກສ ຮັບປະເທດສະມາຊິກໃໝ່ເປັນຄັ້ງປະຫວັດສາດ, ຜູ້ນຳ 30 ກວ່າປະເທດ ແລະ ອົງການຈັດຕັ້ງສາກົນໄດ້ເຕົ້າໂຮມກັນຢູ່ນະຄອນຄາຊານເພື່ອຮ່ວມກັນເປິກສາຫາລືແຜນການຮ່ວມມື ແລະ ພັດທະນາ, ທ່ານສີຈິ້ນຜິງ ປະທານປະເທດຈີນກໍໄດ້ເຂົ້າຮ່ວມກອງປະຊຸມຕາມຄຳເຊີນ.

ປີ 2009, ໃນເວລາຈັດກອງປະຊຸມສຸດຍອດຄັ້ງທຳອິດຂອງບຣິກສ ມີສະມາຊິກແຕ່ 4 ປະເທດ ຄື: ເບຣຊິນ ຣັດເຊຍ ອິນເດຍ ແລະ ຈີນ; ຫຼັງຈາກນັ້ນ 1 ປີ, ອາຟຣິກາໃຕ້ໄດ້ເຂົ້າເປັນສະມາຊິກປະເທດບຣິກສ, 4 ປະເທດຂອງບຣິກສໄດ້ກາຍເປັນ 5 ປະເທດ. ປີນີ້, ບຣິກສໄດ້ເພີ່ມສະມາຊິກໃໝ່ເປັນຄັ້ງປະຫວັດສາດແລ້ວກໍກາຍເປັນ 10 ປະເທດ. ພ້ອມກັນນັ້ນ, ໄທ, ກູບາ ຊີຣີ ເບລາຣູຊີ ແລະອື່ນໆອີກ 30 ປະເທດໄດ້ສະແດງຄວາມປາດຖະໜາທີ່ເຂົ້າເປັນສະມາຊິກບຣິກສ.

ໃນສະພາບການສາກົນທີ່ມີຄວາມປັ່ນປ່ວນສະຫຼັບສັບຊ້ອນຄືໃນປັດຈຸບັນ, ເປັນຫຍັງ ກົນໄກການຮ່ວມມືບຣິກສ ຈຶ່ງໄດ້ຮັບຄວາມນິຍົມນັບມື້ເພີ່ມຂຶ້ນ? ການເຂົ້າເປັນສະມາຊິກບຣິກສມີຜົນປະໂຫຍດແນວໃດຕໍ່ປະເທດ “ເຂດໂລກໃຕ້”?

ປະຊາກອນຂອງ “ບຣິກສໃຫຍ່” ຄືພາຍຫຼັງເພີ່ມສະມາຊິກແລ້ວໄດ້ກວມເອົາເກືອບໜຶ່ງສ່ວນສອງຂອງໂລກ, ຖ້າຄິດໄລ່ຕາມກຳລັງຈັດຊື້ດ້ວຍລາຄາທີ່ກຳນົດໂດຍລັດຖະບານແລ້ວ, ຍອດປະລິມານເສດຖະກິດໃນໄລຍະປັດຈຸບັນໄດ້ລື່ນກາຍກຸ່ມG7, ອັດຕາການປະກອບສ່ວນຕໍ່ການເຕີບໂຕຂອງເສດຖະກິດໂລກຫຼາຍກວ່າ 50%; “ບຣິກສໃຫຍ່” ນອກຈາກມີທ່າແຮງດ້ານຂະໜາດໃຫຍ່ແລ້ວ, ຍັງໄດ້ເປັນຕົວແທນແບບລວມສູນໃຫ້ແກ່ທ່າແຮງດ້ານຊັບພະຍາກອນ ແລະ ທ່າແຮງດ້ານການເຕີບໂຕຂອງປະເທດທີ່ເປັນຕະຫຼາດໃໝ່. ໃນສາຍຕາຂອງປະຊາຊົນສ່ວນໃຫຍ່ໃນປະເທດ “ເຂດໂລກໃຕ້”, ການເຂົ້າເປັນສະມາຊິກບຣິກສມີຜົນດີຕໍ່ການຊຸກຍູ້ການພັດທະນາເສດຖະກິດ, ຍົກລະດັບການຄ້າ, ດຶງດູດການລົງທຶນໄດ້ຫຼາຍກວ່າເກົ່າ, ຫຼຸດຜ່ອນການອາໄສເງິນໂດລາ, ແລະ ຍົກສູງຖານະບົດບາດຂອງປະເທດຕົນ, ທັງໝົດເຫຼົ່ານີ້ລ້ວນແຕ່ສອດຄ່ອງກັບຄວາມຕ້ອງການທົ່ວໄປ ສົມເຫດສົມຜົນ ແລະ ຮີບດ່ວນຂອງປະເທດ “ເຂດໂລກໃຕ້”.

ພ້ອມກັນນັ້ນ, “ບຣິກສໃຫຍ່” ບໍ່ພຽງແຕ່ໄດ້ບັນຈຸຄວາມຫວັງແຫ່ງການພັດທະນາຂອງ “ເຂດໂລກໃຕ້”ເທົ່ານັ້ນ, ຍັງເປັນກຳລັງຫຼັກແຫຼ່ງທີ່ຍຶດໝັ້ນ ແລະ ປົກປັກຮັກສາລັດທິຫຼາຍຝ່າຍທີ່ແທ້ຈິງອີກດ້ວຍ. ໃນຖານະເປັນຖັນແຖວທຳອິດຂອງ “ເຂດໂລກໃຕ້”, ບຣິກສໄດ້ພະຍາຍາມມາໂດຍຕະຫຼອດເພື່ອມຸ່ງເນັ້ນປະກອບສ່ວນເຂົ້າໃນການຊຸກຍູ້ການຫັນເປັນຫຼາຍຂົ້ວຂອງໂລກຢ່າງສະເໝີພາບ ແລະ ເປັນລະບຽບ, ກໍຄື ເສດຖະກິດໂລກາພິວັດໃຫ້ມີຜົນປະໂຫຍດທົ່ວເຖິງ ແລະ ກວມລວມ. ໃນອະນາຄົດ, ຄຽງຄູ່ກັບມີບັນດາປະເທດສະໝັກເຂົ້າເປັນສະມາຊິກຫຼາຍຂຶ້ນ, “ບຣິກສໃຫຍ່” ຈະມີບົດບາດທີ່ຕັ້ງໜ້າ ໝັ້ນທ່ຽງ ແລະ ກ້າວສູ່ທິດທາງບວກໃນວຽກງານສາກົນນັ້ນນັບມື້ນັບພົ້ນເດັ່ນຂຶ້ນ, ກຳລັງທີ່ປົກປັກຮັກສາການຫັນເປັນຫຼາຍຂົ້ວ ແລະ ລັດທິຫຼາຍຝ່າຍຂອງໂລກຈະນັບມື້ນັບເຂັ້ມແຂງຂຶ້ນ. ນອກນີ້, ກົນໄກການຮ່ວມມືບຣິກສສົ່ງເສີມ ກວມລວມ ຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ, ເຮັດໃຫ້ປະເທດສະມາຊິກສາມາດມີສ່ວນຮ່ວມໃນການຮ່ວມມືຂອງໂລກຢ່າງສະເໝີພາບກັນ ແລະ ຍຸຕິທຳ. ຄວາມຮຽກຮ້ອງ ແລະ ຄວາມປາດຖະໜາດ້ານການພັດທະນາຂອງປະເທດສະມາຊິກກໍໄດ້ຮັບຄວາມເຄົາລົບຢ່າງເຕັມສ່ວນ. ໂດຍຜ່ານການເຂົ້າເປັນສະມາຊິກບຣິກສ, ບໍ່ພຽງແຕ່ສາມາດຂຸດຄົ້ນກຳລັງບົ່ມຊ້ອນດ້ານການພັດທະນາຂອງຕົນ, ໃນຂະນະດຽວກັນຍັງໄດ້ຮັບການເຄົາລົບກຽດສັກສີຂອງຊາດ ແລະ ເສັ້ນທາງການພັດທະນາຂອງຕົນຢ່າງເຕັມສ່ວນ. ພາຍໃຕ້ສະພາບການນີ້, ການຮ່ວມມືລະຫວ່າງປະເທດຕ່າງໆ ໂດຍສະເພາະແມ່ນການຮ່ວມມືໃນຂົງເຂດເສດຖະກິດການຄ້າໄດ້ມີຂອບເຂດທີ່ກວ້າງຂວາງກວ່າເກົ່າ.

ໃນຖານະເປັນປະເທດປະດິດສ້າງ, ຈີນເປັນປະເທດສະໜັບສະໜູນ ແລະ ເຂົ້າຮ່ວມກົນໄກການຮ່ວມມືບຣິກສຢ່າງເດັດດ່ຽວ ແລະ ໄດ້ເສີມຂະຫຍາຍບົດບາດນຳໜ້າທີ່ສຳຄັນ. ຈາກການສະເໜີ “ນ້ຳໃຈບຣິກສ” ຮອດການລິເລີ່ມສ້າງທະນາຄານພັດທະນາໃໝ່, ຈົນຮອດສະເໜີຮູບແບບ “ບຣິກສ + ”, ຈີນໄດ້ປະກອບສ່ວນເຂົ້າໃນການເສີມສ້າງກົນໄກການຮ່ວມມືບຣິກສຢ່າງສະເໝີຕົ້ນສະເໝີປາຍ. ທ່ານສີຈິ້ນຜິງ ປະທານປະເທດຈີນຊີ້ອອກວ່າ, “ພວກເຮົາຄວນຍຶດຖືນ້ຳໃຈບຣິກສທີ່ເປີດກວ້າງ ກວມລວມ ແລະ ຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ, ເຮັດໃຫ້ຫຼາຍປະເທດສະໝັກເຂົ້າເປັນສະມາຊິກຂອງວົງຄະນາຍາດບຣິກສຫຼາຍກວ່າເກົ່າ.”

ໃນບັນດາອົງການຈັດຕັ້ງລະຫວ່າງປະເທດຫຼາຍແຫ່ງ, ການທີ່“ບຣິກສ” ໄດ້ຮັບຄຳຮ້ອງສະໝັກເຂົ້າເປັນສະມາຊິກຢ່າງຟົດຟື້ນແບບນີ້ແມ່ນເຫັນມີໜ້ອຍ. ສິ່ງນີ້ສະແດງໃຫ້ເຫັນຢ່າງເຕັມສ່ວນວ່າ, ໃນຖານະເປັນຕົວແທນຂອງ “ເຂດໂລກໃຕ້”, ກົນໄກບຣິກສພວມດຶງດູດປະເທດ“ເຂດໂລກໃຕ້”ນັບມື້ນັບຫຼາຍຂຶ້ນດ້ວຍມົນສະເໜ່ພິເສດຂອງຕົນ. ພວກເຮົາຫວັງວ່າ ກອງປະຊຸມສຸດຍອດຢູ່ຄາຊານໃນຄັ້ງນີ້ຈະຂຽນບົດໃໝ່ສຳລັບການພັດທະນາທີ່ເປັນປຶກແຜ່ນ ແລະ ຮ່ວມກັນສ້າງຄວາມເຂັ້ມແຂງດ້ວຍຕົນເອງໃຫ້ກັບ “ເຂດໂລກໃຕ້”. ຈີນຈະສືບຕໍ່ຮ່ວມກັບຝ່າຍຕ່າງໆທຳຄວາມພະຍາຍາມ ຊຸກຍູ້ການຮ່ວມມືຂອງ “ບຣິກສໃຫຍ່” ໃຫ້ກ້າວເດີນໄປຂ້າງໜ້າຢ່າງໝັ້ນທ່ຽງ.

.md_Laos_page01 .md_hd{width:300px;}

ຄໍລຳ