ທ່ານຫວາງຢີ້ພົບປະກັບລັດຖະມົນຕີຕ່າງປະເທດອາເມຣິກາ

ວັນທີ 27 ກັນຍານີ້, ໃນໄລຍະເຂົ້າຮ່ວມກອງປະຊຸມສະມັດຊາໃຫຍ່ອົງການສະຫະປະຊາຊາດທີ່ນະຄອນນິວຢອກ, ທ່ານຫວາງຢີ້ ກຳມະການກົມການເມືອງສູນກາງພັກກອມມູນິດຈີນ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານອັນໂທນີ ບລິນເກນ ລັດຖະມົນຕີກະຊວງການຕ່າງປະເທດອາເມຣິກາຕາມການນັດໝາຍ.

ທ່ານຫວາງຢີ້ກ່າວວ່າ: ພາຍໃຕ້ການຊີ້ນຳນຳພາທາງຍຸດທະສາດຈາກປະມຸກລັດສອງປະເທດ, ການພົວພັນຈີນ-ອາເມຣິກາໄດ້ຮັບຄວາມຄືບໜ້າທີ່ບໍ່ງ່າຍ, ເປັນໜ້າທະນຸຖະໜອມ. ການພົວພັນຈີນ-ອາເມຣິກາຟື້ນຟູຄວາມເປັນປົກກະຕິ ຈະສອດຄ່ອງກັບຜົນປະໂຫຍດຂອງປະຊາຊົນສອງຊາດ ແລະ ສອດຄ່ອງກັບຄວາມຄອງຄອຍຂອງປະຊາຄົມໂລກ, ຈະສາມາດຮັກສາທ່ວງທ່ານີ້ໄດ້ຫຼືບໍ່ ແມ່ນຕັດສິນຢູ່ນຳຄວາມພະຍາຍາມຂອງສອງຝ່າຍ. ອາເມຣິກາບໍ່ຄວນປະຕິບັດຕໍ່ຈີນແບບ “ໜ້າໄຫວ້ຫຼັງຫຼອກ” ໂດຍຕະຫຼອດ, ດ້ານໜຶ່ງປິດລ້ອມແລະກີດກັ້ນຈີນຕາມລຳພັງໃຈ, ອີກດ້ານໜຶ່ງຍັງທຳເປັນສົນທະນາແລະຮ່ວມມືກັບຈີນແບບຕີໜ້າຕາຍ.

ສອງຝ່າຍເຫັນດີເປັນເອກະພາບກັນວ່າ: ການພົບປະຄັ້ງນີ້ແມ່ນກົງໄປກົງມາ ແລະ ມີລັກສະນະຈິງຈັງແທ້ຈິງ ພ້ອມທັງເຫັນວ່າ ສອງປະເທດຈີນແລະອາເມຣິກາຕ້ອງຊອກຫາເສັ້ນທາງການຢູ່ຮ່ວມກັນໂດຍສັນຕິຢ່າງຖາວອນ. ສອງຝ່າຍຈະສືບຕໍ່ຈັດຕັ້ງປະຕິບັດຕາມຄວາມເຫັນທີ່ເປັນເອກະພາບກັນຂອງການພົບປະຊັນຟຣານຊີສໂກລະຫວ່າງປະມຸກລັດສອງປະເທດ, ດຳເນີນການສົນທະນາ ແລະ ຮ່ວມມືກັນ, ຄຸ້ມຄອງ ແລະ ຄວບຄຸມຄວາມຂັດແຍ້ງກັນຢ່າງເໝາະສົມ, ພະຍາຍາມເຮັດໃຫ້ການພົວພັນລະຫວ່າງສອງປະເທດຂະຫຍາຍຕົວຢ່າງໜັກແໜ້ນ, ປອດໃສ ແລະ ຍືນຍົງ.

ສອງຝ່າຍເຫັນດີຈະຮັກສາການແລກປ່ຽນກ່ຽວກັບບັນຫາຈຸດສຸມຂອງສາກົນແລະພາກພື້ນ ແລະ ຈັດການເປິກສາຫາລືລະຫວ່າງຈີນ-ອາເມຣິກາກ່ຽວກັບວຽກງານອາຊີ-ປາຊີຟິກຮອບໃໝ່ໃນເວລາອັນເໝາະສົມ.

.md_Laos_page01 .md_hd{width:300px;}

ຄໍລຳ

ຮູບພາບ

ວີດີໂອ

ສະຖານທີ່ຜະລິດເຮືອບິນລຳທຳອິດຂອງ ສປ ຈີນຢູ່ໃສ?