ອົງການWHOເລີ່ມປະຕິບັດແຜນຍຸດທະສາດໂລກເພື່ອສະກັດກັ້ນການແຜ່ລະບາດຂອງພະຍາດເອັມພອກ

cri2024-08-28 11:19:06

ວັນທີ26ສິງຫານີ້, ອົງການອະນາໄມໂລກຫຼືWHOໄດ້ເລີ່ມປະຕິບັດແຜນຍຸດທະສາດໂລກແນໃສ່ປ້ອງກັນ ແລະ ຮັບມືກັບການແຜ່ລະບາດຂອງພະຍາດພະຍາດເອັມພອກ(MPOX) ໂດຍຜ່ານຈາກຄວາມພະຍາຍາມປະສານງານລະຫວ່າງທົ່ວໂລກ, ເຂດແຄວ້ນ ແລະ ປະເທດຕ່າງໆເພື່ອສະກັດກັ້ນການແຜ່ລະບາດຂອງພະຍາດນີ້.

ຖະແຫຼງຂ່າວຂອງອົງການWHOໄດ້ລະບຸວ່າ: ແຜນການດັ່ງກ່າວຈະເລີ່ມຕົ້ນປະຕິບັດແຕ່ເດືອນກັນຍາປີນີ້ຈົນຮອດເດືອນກຸມພາປີໜ້າ ໂດຍໃຊ້ງົບປະມານ 135 ລ້ານໂດລາ. ແຜນການນີ້ຈະປະຕິບັດຍຸດທະສາດຕິດຕາມວັດແທກ, ປ້ອງກັນ ແລະ ຮັບມືຢ່າງຮອບດ້ານຕໍ່ພະຍາດເອັມພອກ, ຊຸກຍູ້ການຄົ້ນຄວ້າ ແລະ ການເຂົ້າເຖິງອຸປະກອນການແພດຕ່າງໆຢ່າງຍຸຕິທຳເຊັ່ນ ເຄື່ອງກວດຫາເຊື້ອ ແລະ ວັກຊີນເປັນຕົ້ນ, ພະຍາຍາມສຸດຂີດເພື່ອຫຼຸດຜ່ອນການແຜ່ເຊື້ອຈາກສັດສູ່ຄົນໃຫ້ໜ້ອຍລົງເທົ່າທີ່ຈະໜ້ອຍໄດ້ ກໍຄືຍົກສູງຄວາມສາມາດຂອງເຂດຊຸມຊົນໃນການຕັ້ງໜ້າເຂົ້າຮ່ວມການປ້ອງກັນ ແລະ ຄວບຄຸມພະຍາດ.

ຖະແຫຼງຂ່າວຍັງລະບຸຕື່ມວ່າ: ແຜນຍຸດທະສາດດັ່ງກ່າວຍັງຈະຊຸກຍູ້ການສັກວັກຊີນໃຫ້ກຸ່ມຄົນທີ່ມີຄວາມສ່ຽງສູງເຊັ່ນ: ຜູ້ທີ່ສຳຜັດກັບຜູ້ຕິດພະຍາດຢ່າງໃກ້ຊິດ ແລະ ພະນັກງານການແພດເປັນຕົ້ນ ເພື່ອຕັດຕ່ອງໂສ້ການແຜ່ລະບາດ.

.md_Laos_page01 .md_hd{width:300px;}

ຄໍລຳ