ທ່ານ ຢີ້ຊວິນລີນ: ຊີວິດດົນຕີຂອງກຳມະກອນກໍ່ສ້າງ

cri2024-02-20 11:05:30

ຢີ້ຊວິນລີນຫຼິ້ນປີອາໂນຕາມຖະໜົນຂອງນະຄອນເຊີ່ນເຈີ້ນ

ຫວ່າງກ່ອນນີ້ບໍ່ດົນ, ທ່ານ ຢີ້ຊວິນລີນ ກຳມະກອນກໍ່ສ້າງທີ່ມີຊື່ສຽງໂດ່ງດັງຂຶ້ນທາງອອນລາຍຍ້ອນຫຼິ້ນປີອາໂນຢູ່ຕາມຖະໜົນ ໄດ້ຖືກເຊີນເຂົ້າຮ່ວມງານລາຕີສະຫຼອງບຸນກຸດຈີນ 2024 ທີ່ຈັດໂດຍວິທະຍຸໂທລະພາບສູນກາງຈີນ ຫຼື CMG. ເລື່ອງລາວທີ່ຮັກຫອມຊີວິດ ແລະ ດູດດື່ມກັບດົນຕີຂອງລາວນັ້ນ ກໍໄດ້ຖືກເຜີຍແຜ່ໃຫ້ຄົນຮູ້ຫຼາຍກວ່າເກົ່າ.

ທ່ານ ຢີ້ຊວິນລີນ ເປັນຄົນນະຄອນເຢວ້ຢາງ ແຂວງຮູນານ, ທາງພາກກາງຂອງຈີນ, ປີນີ້ມີອາຍຸ 58 ປີ. ໃນປີ 2004, ລາວພາລູກຊາຍໄປເຮັດວຽກເປັນກຳມະກອນກໍ່ສ້າງຢູ່ນະຄອນເຊີ່ນເຈີ້ນ ທາງພາກໃຕ້ຂອງຈີນ. ໃນມື້ໜຶ່ງຂອງລະດູຮ້ອນປີ 2023, ທ່ານ ຢີ້ຊວິນລີນ ແລະ ລູກຊາຍຍ່າງຜ່ານປາກສະຖານີລົດໄຟໃຕ້ດິນແຫ່ງໜຶ່ງ, ພໍດີໄດ້ເຫັນມີຄົນກຳລັງຫຼິ້ນປີອາໂນຢູ່ໃນກິດຈະກຳສາທາລະນະປະໂຫຍດ.ພາຍໃຕ້ການໃຫ້ກຳລັງໃຈຈາກລູກຊາຍ, ລາວຈິ່ງນັ່ງລົງຫຼິ້ນປີອາໂນ ກໍເລີຍໄດ້ຮັບຄວາມສົນໃຈຈາກຊາວເນັດທັງຫຼາຍ.

ທ່ານ ຢີ້ຊວິນລີນ ເຮັດວຽກຢູ່ສະຖານທີ່ກໍ່ສ້າງ

ທ່ານ ຢີ້ຊວິນລີນ ມັກດົນຕີແຕ່ຍາມຍັງນ້ອຍ ແລະ ສຶກສາດ້ວຍຕົນເອງ ໂດຍໄດ້ຮຽນຫຼິ້ນດົນຕີໃຫ້ເປັນຫຼາຍຢ່າງເຊັ່ນ: ຮາໂມນິກາ （Harmonica）, ທູບາໃຫຍ່(Tuba), ທຣູມເປັດ（Trumpet） ແລະອື່ນໆ. ລາວເຮັດວຽກຢູ່ເຊີ່ນເຈີ້ນເກືອບ 20 ປີ, ເຄີຍເຮັດວຽກປະກອບເຄື່ອງຫຼິ້ນ, ຂຸດດິນດ້ວຍຊວ້ານ, ປະສົມຊີມັງ ແລະອື່ນໆ. ແຕ່ຫຼັງຈາກເລີກການແລ້ວ, ລາວມັກຫຼິ້ນຮາໂມນິກາ, ເປົ່າຂຸ່ຍ（flute）ເຊິ່ງໄດ້ຍຶດໝັ້ນຄວາມມັກນີ້ມາໂດຍຕະຫຼອດ.