ທ່ານສີຈິ້ນຜິງພົບປະເຈລະຈາກັບປະທານາທິບໍດີເບຣຊິນ

ຕອນເຊົ້າວັນທີ 20 ພະຈິກນີ້,ຢູ່ທຳນຽບປະທານາທິບໍດີເບຣຊິນທີ່ນະຄອນຫຼວງບຣາຊີເລຍ, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານລູອິດ ອີນາຊີໂອ ລູລາ ດາ ຊິນວາ ປະທານາທິບໍດີເບຣຊິນ.

ໃນໂອກາດດັ່ງກ່າວ, ທ່ານສີຈິ້ນຜິງ ໄດ້ສະເໜີຂໍ້ສະເໜີ4ດ້ານກ່ຽວກັບການຂະຫຍາຍສາຍພົວພັນລະຫວ່າງສອງປະເທດໃນອະນາຄົດຄື ໜຶ່ງ, ຮ່ວມຊາຕາກຳນຳກັນ, ປັບປຸງຄວາມໄວ້ເນື້ອເຊື່ອໃຈກັນທາງດ້ານຍຸດທະສາດໃຫ້ໝັ້ນຄົງຢ່າງບໍ່ຢຸດຢັ້ງ. ສອງ, ພັດທະນາຮ່ວມກັນ, ລົງເລິກການເຊື່ອມຕໍ່ຍຸດທະສາດການພັດທະນາຂອງກັນຢ່າງຕໍ່ເນື່ອງ. ສາມ, ແບກຫາບຄວາມຮັບຜິດຊອບຮ່ວມກັນ, ສະແດງໃຫ້ເຫັນກຳລັງແຮງຂອງຈີນ-ເບຣຊິນເພື່ອການປົກປັກຮັກສາສັນຕິພາບ ແລະ ຄວາມເປັນທຳຂອງໂລກ. ສີ່, ຮ່ວມທຸກຮ່ວມສຸກນຳກັນ, ປະກອບສ່ວນຂອງຈີນ-ເບຣຊິນເຂົ້າໃນການສ້າງປະຊາຄົມຮ່ວມຊາຕາກຳຂອງມວນມະນຸດ.

ພາຍຫຼັງພົບປະເຈລະຈາແລ້ວ, ປະມຸກລັດສອງປະເທດໄດ້ຮ່ວມກັນລົງນາມໃນຖະແຫຼງການຮ່ວມລະຫວ່າງສາທາລະນະລັດປະຊາຊົນຈີນ ກັບ ສາທາລະນະລັດສະຫະພັນເບຣຊິນກ່ຽວກັບການຮ່ວມກັນສ້າງຄູ່ຮ່ວມຊາຕາກຳຈີນ-ເບຣຊິນເພື່ອໂລກທີ່ຍຸຕິທຳ ແລະ ໜ່ວຍໂລກທີ່ຍືນຍົງກວ່າເກົ່າ.

ໃນໄລຍະທ່ານສີຈິ້ນຜິງຢ້ຽມຢາມເບຣຊິນ, ສອງປະເທດຈີນ-ເບຣຊິນຍັງໄດ້ລົງນາມໃນເອກະສານຮ່ວມມືສອງຝ່າຍ30ກວ່າສະບັບເຊິ່ງກ່ຽວຂ້ອງກັບຂົງເຂດຕ່າງໆເຊັ່ນ: ເສດຖະກິດການຄ້າ, ການລົງທຶນ, ກະສິກຳ, ເສດຖະກິດດິຈີຕອນ, ການພັດທະນາແບບຍືນຍົງ, ວິທະຍາສາດເຕັກໂນໂລຊີ, ປັນຍາປະດິດ, ການຮ່ວມມືເພື່ອການພັດທະນາທົ່ວໂລກ ແລະອື່ນໆ.

.md_Laos_page01 .md_hd{width:300px;}

ຄໍລຳ

ຮູບພາບ