ທ່ານສີຈິ້ນຜິງເຂົ້າຮ່ວມກອງປະຊຸມສຸດຍອດກຸ່ມ G20 ຄັ້ງທີ 19 ແລະ ກ່າວຄຳປາໄສສຳຄັນ

ຕອນເຊົ້າວັນທີ 18 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມສຸດຍອດກຸ່ມ 20 ປະເທດຫຼື G20 ຄັ້ງທີ 19 ທີ່ຈັດຂຶ້ນຢູ່ນະຄອນຣີໂອເດີຈາເນໂຣ ປະເທດເບຣຊິນ.

ໃນໄລຍະທຳອິດຂອງກອງປະຊຸມສຸດຍອດຄັ້ງນີ້ໄດ້ດຳເນີນການເປິກສາຫາລືໂດຍປິ່ນອ້ອມຫົວຂໍ້ “ຕ້ານຄວາມອຶດຫິວ ແລະ ຄວາມທຸກຍາກ”, ທ່ານສີຈິ້ນຜິງໄດ້ກ່າວຄຳປາໄສສຳຄັນພາຍໃຕ້ຫົວຂໍ້ “ສ້າງໂລກທີ່ຍຸຕິທຳແຫ່ງການພັດທະນາຮ່ວມກັນ”.

ໃນໂອກາດດັ່ງກ່າວ, ທ່ານສີຈິ້ນຜິງຊີ້ໃຫ້ເຫັນວ່າ: ການພັດທະນາຂອງຈີນເປັນພາກສ່ວນສຳຄັນຂອງການພັດທະນາຮ່ວມກັນຂອງໂລກ. ຈີນເປັນສະມາຊິກຂອງເຂດໂລກໃຕ້ຢ່າງສະເໝີຕົ້ນສະເໝີປາຍ, ເປັນຄູ່ຮ່ວມມືຍາວນານທີ່ໜ້າໄວ້ ໃຈຂອງບັນດາປະເທດພວມພັດທະນາ ທັງເປັນຜູ້ເຄື່ອນໄຫວ ແລະ ປະຕິບັດຕົວຈິງໃນການສະໜັບສະໜູນພາລະກິດການພັດທະນາໂລກ, ຍິນດີຮ່ວມກັບປະເທດພວມພັດທະນາທັງຫຼາຍບັນລຸການຫັນເປັນທັນສະໄໝ.

ທ່ານລູອິສ ອິນາຊິໂອ ລູລາ ດາຊິນວາ ປະທານາທິບໍດີເບຣຊິນໄດ້ເປັນປະທານກອງປະຊຸມຄັ້ງນີ້.

ກ່ອນກອງປະຊຸມສຸດຍອດເລີ່ມຕົ້ນຂຶ້ນ, ທ່ານສີຈິ້ນຜິງ ແລະ ບັນດາຜູ້ນຳທີ່ເຂົ້າຮ່ວມປະຊຸມໄດ້ຮ່ວມກັນເຂົ້າຮ່ວມພິທີເປີດ “ສະຫະພັນສາກົນເພື່ອຕ້ານຄວາມອຶດຫິວ ແລະ ຄວາມທຸກຍາກ” ທີ່ລິເລີ່ມໂດຍປະເທດເບຣຊິນ.

.md_Laos_page01 .md_hd{width:300px;}

ຄໍລຳ

ຮູບພາບ