location:laos.china.com > ຂ່າວ > ຂ່າວຈີນ > ເນື້ອໃນ

ທ່ານ ສີ​ຈິ້ນ​ຜິງ ພົບ​ປະ​ເຈ​ລະ​ຈາ​ກັບ​ທ່ານ ກິມ​ເຈິງ​ອຸນ

2019-01-10 12:06:07

ວັນ​ທີ 8 ມັງ​ກອນນີ້, ທ່ານ ສີ​ຈິ້ນ​ຜິງ ເລ​ຂາ​ທິ​ການ​ໃຫຍ່​ສູນ​ກາງ​ພັກ​ກອມ​ມູ​ນິດ​ຈີນ ປະ​ທານ​ປະ​ເທດ​ຈີນ ໄດ້​ພົບ​ປະ​ເຈ​ລະ​ຈາ​ກັບ​ທ່ານ ກິມ​ເຈິງ​ອຸນ ປະ​ທານ​ຄະ​ນະ​ກຳ​ມະ​ການສູນ​ກາງ​ພັກ​ແຮງ​ງານ ​ທັງ​ເປັນປະ​ທານ​ຄະ​ນະ​ກຳ​ມະ​ການ​ແຫ່ງ​ລັດ​ ສ​ປ​ປ ເກົາຫຼີ​ທີ່​ເດີນ​ທາງ​ມາ​ເຖິງ​ນະ​ຄອນຫຼວງ​ປັກ​ກິ່ງ​ເພື່ອ​ຢ້ຽມ​ຢາມ​ຈີນ​ໃນ​ມື້​ດຽວ​ກັນ. ໃນ​ທ່າມ​ກາງ​ບັນ​ຍາ​ກາດ​ທີ່​ສະ​ໜິດ​ສະ​ໜົມ​ແລະ​ມິດ​ຕະ​ພາບ, ຜູ້​ນຳ​ສອງ​ປະ​ເທດໄດ້​ແລກ​ປ່ຽນ​ຄວາມ​ຄິດ​ເຫັນ​ແລະ​ໄດ້​ບັນ​ລຸ​ຄວາມ​ເຫັນ​ເປັນ​ເອ​ກະ​ພາບ​ກັນ​ອັນ​ສຳ​ຄັນ​ກ່ຽວ​ກັບ​ສາຍ​ພົວ​ພັນ​ຈີນ-ສ​ປ​ປ​ເກົາຫຼີ​ແລະ​ບັນ​ຫາ​ທີ່​​ສອ​ງ​ຝ່າຍ​ມີ​ຄວາມ​ສົນ​ໃຈ​ຮ່ວມ​ກັນ. ສອງ​ຝ່າຍ​​ເຫັນ​ດີເປັນ​ເອ​ກະ​ພາບ​ກັນວ່າ, ຍິນ​ດີສຸມ​ທຸກ​ຄວາມ​ພະ​ຍາ​ຍາມ​​ຮ່ວມ​ກັນຊຸກ​ຍູ້​ສາຍ​ພົວ​ພັນ​ຈີນ-ສ​ປ​ປ​ເກົາຫຼີ​ໃຫ້​ໄດ້​ຮັບ​ການ​ພັ​ດ​ທະ​ນາ​ໃໝ່​ໃນ​ຍຸກ​ໃໝ່​ຢ່າງ​ບໍ່​ຢຸດຢັ້ງ, ສືບ​ຕໍ່​ຊຸກ​ຍູ້​ຂະ​ບວນ​ການ​ແກ້​ໄຂ​ບັນ​ຫາ​ແຫຼມ​ເກົາ​ຫຼີ​ດ້ວຍ​ວິ​ທີ​ທາງ​ການ​ເມືອງ ເພື່ອ​ສ້າງ​ຄວາມ​ຜາ​ສຸກ​ໃຫ້​ປະ​ຊາ​ຊົນ​ສອງ​ປະ​ເທດ​ໃຫ້​ດີກວ່າ​ເກົ່​າ ແລະ ປະ​ກອບ​ສ່ວນ​ຢ່າງ​ຕັ້ງ​ໜ້າ​ເພື່ອ​ສັນ​ຕິ​ພາບ, ສະ​ຖຽນ​ລະ​ພາບ, ຄວາມ​ຈະ​ເລີນ​ຮຸ່ງ​ເຮືອງ ແລະ​ການ​ພັດ​ທະ​ນາ​ຂອງ​ພາກ​ພື້ນ​ກໍ​ຄື​ຂອງ​ໂລກ.

ທ່ານ ສີ​ຈິ້ນ​ຜິງ ເນັ້ນ​ໜັກ​ວ່າ: ​ໃນປີ 2018 ຜ່ານ​ມາ, ພາຍ​ໃຕ້​ຄວາມ​ພະ​ຍາ​ຍາມ​ຮ່ວມ​ກັນ, ສາຍ​ພົວ​ພັນ​ຈີນ-ສ​ປ​ປ​ເກົາຫຼີ ໄດ້​ຂຽນ​ໜ້າ​ໃໝ່​ໃນ​ປະ​ຫວັດ​ສາດ. ສອງ​ຝ່າຍ​ໄດ້​ສະ​ແດງ​ໃຫ້​ເຫັນ​ເຖິງ​ພະ​ລັງ​ຊີ​ວິດ​ອັນ​ແຂງ​ແຮງ​ຂອງ​ມິດ​ຕະ​ພາບ​ຈີນ-ສ​ປ​ປ​ເກົາຫຼີ​ດ້ວຍ​ການ​ກະ​ທຳ​ຕົວ​ຈິງ, ທັງໄດ້​ສ່ອງ​ແສງ​ໃຫ້​ເຫັນ​ເຖິງ​ມາ​ນະ​ຈິດ​ອັນ​ເດັດ​ດ່ຽວ​ຂອງ​ສອງ​ປະ​ເທດ​ໃນ​ການ​ຮ່ວມ​ກັນ​ສຸມ​ໃສ່​ຊຸກ​ຍູ້​ຂະ​ບວນ​ການ​ແກ້​ໄຂ​ບັນ​ຫາ​ແຫຼມ​ເກົາຫຼີ​ດ້ວຍ​ວິ​ທີ​ທາງ​ການ​ເມືອງ. ປີນີ້​ແມ່ນ​ຈີນ​-ສ​ປ​ປ​ເກົາຫຼີ​ສ້າງ​ຕັ້ງ​ສາຍ​ພົວ​ພັນ​ທາງ​ການ​ທູດ​ຄົບ​ຮອບ 70 ປີ, ເຊິ່ງ​ມີ​ຄວາມ​ໝາຍ​ສຳ​ຄັນ​​ໃນ​ການ​ສືບ​ຕໍ່​ອັນ​​ທີ່​ມີ​ຢູ່​ແລ້ວ​ແລະ​ສົ່ງ​ເສີມ​ອັນ​ໃໝ່ໃນ​​ການ​ພັດ​ທະ​ນາ​ສາຍ​ພົວ​ພັນ​ຈີນ-ສ​ປ​ປ​ເກົາຫຼີ. ຂ້າ​ພະ​ເຈົ້າ​ຍິນ​ດີ​ຮ່ວມ​ກັບ​ສະ​ຫາຍ​ປະ​ທານ, ຮ່ວມ​ກັນ​ນຳ​ພາການ​ພັດ​ທະ​ນາ​ສາຍ​ພົວ​ພັນ​ສອງ​ປະ​ເທດ​​ໃຫ້​ດີໃນ​ອະ​ນາ​ຄົດ. ​ການ​ນຳຂັ້ນ​ສູງສອງ​ຝ່າຍ​ຄວນ​ຮັກ​ສາ​ການ​ໄປ​ມາ​ຫາ​ສູ່​ກັນ, ເພີ່ມ​ທະ​ວີ​ການ​ແລກ​ປ່ຽນ​ດ້ານ​ຍຸດ​ທະ​ສາດ, ລົງ​ເລິກ​ການ​ແລກ​ປ່ຽນ​ແລະ​ການ​ຮ່ວມ​ມື​​ບົນ​ຈິດໃຈ​ມິດ​ຕະ​ພາບ, ຊຸກ​ຍູ້​ສາຍ​ພົວ​ພັນ​ຈີນ-ສ​ປ​ປ​ເກົາ​ຫຼີ​ໃຫ້​ພັດ​ທະ​ນາ​ຢ່າງ​ປອດ​ໄສ​ແລະ​ໜັກ​ແໜ້ນ​ໃນ​ໄລ​ຍະ​ຍາວ​ນານ.

ກ່ຽວ​ກັບ​ສະ​ຖາ​ນະ​ການ​ແຫຼມ​ເກົາຫຼີ, ທ່ານ ສີ​ຈິ້ນ​ຜິງ ໄດ້​ຕີ​ລາ​ຄາສູງ​ຕໍ່​ສ​ປ​ປ​ເກົາຫຼີ​ທີ່​ໄດ້​ນຳ​ໃຊ້​ມາດ​ຕະ​ການ​ທີ່​ດີ​ເພື່ອ​ປົກ​ປັກ​ຮັກ​ສາ​ສັນ​ຕິ​ພາບ, ສະ​ຖຽນ​ລະ​ພາບ​ຂອງ​ແຫຼມ​ເກົາຫຼີ ແລະ​ຊຸກ​ຍູ້​ການ​ປອດ​ນິວ​ເຄ​ລຍ​ຂອງ​ແຫຼມ​ເກົາຫຼີ, ໂດຍ​ກ່າວ​ວ່າ, ປີ​ຜ່ານ​ມາ, ພາຍ​ໃຕ້​ຄວາມ​ພະ​ຍາ​ຍາມ​ຮ່ວມ​ກັນ​ຂອງ​ຈີນ, ສ​ປ​ປ​ເກົາຫຼີ ແລະ​ຝ່າຍ​ທີ່​ກ່ຽວ​ຂ້ອງ, ​ໃນຂະ​ບວນ​ການ​ແກ້​ໄຂ​ບັນ​ຫາ​ແຫຼມ​ເກົາຫຼີ​ດ້ວຍ​ວິ​ທີ​​ທາງການ​ເມືອງ ໄດ້​ຮັບ​ຄວາມ​ຄືບ​ໜ້າ​ອັນ​ໃຫຍ່ຫຼວງ. ຈີນ​ສະ​ໜັບ​ສະ​ໜູນ​ສ​ປ​ປ​ເກົາຫຼີ​ທີ່​ສືບ​ຕໍ່​ຍຶດ​ໝັ້ນ​ທິດ​ທາງ​ປອດ​ນິວ​ເຄ​ລຍ​ຢູ່​ແຫຼມ​ເກົາຫຼີ, ສະ​ໜັບ​ສະ​ໜູນ​ສອງ​ຝ່າຍ​ເໜືອ​ໃຕ້​ສືບ​ຕໍ່​ປັບ​ປຸງ​ສາຍ​ພົວ​ພັນ​ໃຫ້​ດີ​ຂຶ້ນ, ສະ​ໜັບ​ສະ​ໜູນ​ສ​ປ​ປ​ເກົາຫຼີ​ແລະ​ອາ​ເມ​ຣິ​ກາ​ຈັດ​ການ​ພົບ​ປະ​ລະ​ຫວ່າງ​ຜູ້​ນຳ​ແລະ​ໄດ້​ຮັບ​ໝາກ​ຜົນ, ສະ​ໜັບ​ສະ​ໜູນ​ຝ່າ​ຍ​ທີ່​ກ່ຽວ​ຂ້ອງ​ແກ້​ໄຂ​ບັນ​ຫາ​ທີ່​ຕົນ​​ໃຫ້​ຄວາມ​ສົນ​ໃຈ​ຢ່າງ​ສົມ​ເຫດ​ສົມ​ຜົນ​ໂດຍ​ຜ່ານ​ການ​ເຈ​ລະ​ຈາ.

ທ່ານ ກິມ​ເຈິງ​ອຸນ ກ່າວ​ວ່າ: ໃນ​ໄລ​ຍະ​ບໍ່​ຮອດ​ໜຶ່ງ​ປີ​ທີ່​ຜ່ານ​ມາ, ຂ້າ​ພະ​ເຈົ້າ​ໄດ້​ຢ້ຽມ​ຢາມ​ຈີນ 4 ຄັ້ງ ໂດຍ​ໄດ້​ມີ​ຄວາມ​ປະ​ທັບ​ໃຈ​ຢ່າງ​ເລິກ​ເຊິ່ງ​ຕໍ່​ຜົນ​ງານ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ຂອງ​ຈີນ​ແລະ​ໂສມ​ໜ້າ​ໃໝ່​ໃນ​ການ​ສູ້​ຊົນ​​ຜ່ານ​ຜ່າຂອງ​ປະ​ຊາ​ຊົນ​ຈີນ. ສ​ປ​ປ​ເກົາຫຼີ​ເຫັນ​ວ່າ, ບົດ​ຮຽນ​ການ​ພັດ​ທະ​ນາ​ຂອງ​ຈີນ​ແມ່ນ​ລ້ຳ​ຄ່າ​ທີ່​ສຸດ, ​ທ່ານ​ມີ​ຄວາມຫວັງ​ວ່າ​ຈະ​​ມາຢ້ຽມ​ຢາມ​ຈີນຫຼາຍໆ​ຄັ້ງ​ເພື່ອ​ທັດ​ສະ​ນະ​ສຶກ​ສາ​ແລະ​​ຖອດ​ຖອນ​ບົດ​ຮຽນຕົວ​ຈິງ​ຢູ່​ຈີນ. ເຊື່ອ​ວ່າ ພາຍ​ໃຕ້​ການ​ນຳ​ພາ​ຂອງ​ພັກ​ກອມ​ມູ​ນິດ​ຈີນ​ໂດຍ​ແມ່ນ​ສະ​ຫາຍ​ເລ​ຂາ​ທິ​ການ​ໃຫຍ່​ເປັນ​ແກນ​ກາງ, ປະ​ຊາ​ຊົນ​ຈີນ​ຍ່ອມ​ຈະ​ໄດ້​ສ້າງ​ຜົນ​ງານ​ໃໝ່ອັນ​ຍິ່ງ​ໃຫຍ່​ກວ່າ​ເກົ່າຢ່າງ​ບໍ່​ຢຸດຢັ້ງ​ບົນ​ເສັ້ນ​ທາງ​ສັງ​ຄົມ​ນິ​ຍົມ​ທີ່​ມີ​ສີ​ສັນ​ພິ​ເສດ​ຂອງ​ຈີນ​ໃນ​ຍຸກ​ໃໝ່, ບັນ​ລຸ​ເປົ້າ​ໝາຍ​ສູ້​ຊົນ “100 ປີ​ສອງ​ເຫດ​ການ” ແລະ​ຄວາມ​ໄຝ່​ຝັນ​ແຫ່ງ​ການ​ຟື້ນ​ຟູ​ຄວາມ​ຈະ​ເລີນ​ຮຸ່ງ​ເຮືອງ​ອັນ​ຍິ່ງ​ໃຫຍ່​ຂອງ​ຊົນ​ຊາດ​ຈີນຢ່າງ​ມີ​ໄຊ. ພັກ​ແຮງ​ງານ​ເກົາ​ຫຼີ​ຈະ​ນຳ​ພາ​ປະ​ຊາ​ຊົນ​ສ​ປ​ປ​ເກົາຫຼີ​ສືບ​ຕໍ່​ອອກ​ແຮງ​ຈັດ​ຕັ້ງ​ປະ​ຕິ​ບັດ​ແນວ​ທາງ​ຍຸດ​ທະ​ສາດ​ໃໝ່, ແລະ​ສ້າງ​ສະ​ພາບ​ແວດ​ລ້ອມ​ພາຍນອກ​ທີ່​ດີ​ເພື່ອ​ເລື່ອງນີ້.



ຂ່າວທີ່ທ່ານອາດຈະສົນໃຈ

ຂ່າວ:
ຂ່າວໂລກ ຂ່າວໂລກ ຂ່າວອາຊຽນ
ວີດີໂອ:
ວີດີໂອ
ພາບລວມ:
ພາບລວມ
ເປີດຕຳລາສຸພາສິດ:
ເປີດຕຳລາສຸພາສິດ
China ABC:
China ABC
ຮຽນພາສາຈີນ:
ຮຽນພາສາຈີນ