location:laos.china.com > ຂ່າວ > ຂ່າວຈີນ > ເນື້ອໃນ

ທູດຈີນໃຫ້ສໍາພາດຂ່າວສານປະເທດລາວກ່ຽວກັບລັດຖະບານຈີນຊ່ວຍເຫຼືອລາວກູ້ໄພນໍ້າຖ້ວມຢູ່ເມືອງສະໜາມໄຊ

2018-07-29 16:31:40

ວັນທີ 28 ກໍລະກົດນີ້, ສະຫາຍ ວາງ ເວິນທຽນ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ໄດ້ໃຫ້ສໍາພາດຂ່າວ ແກ່ຂ່າວສານປະເທດລາວ, ເພື່ອແຈ້ງໃຫ້ຊາບກ່ຽວກັບ ລັດຖະບານແລະປະຊາຊົນຈີນ ຊ່ວຍລາວກູ້ໄພນໍ້າຖ້ວມ ຫລັງຈາກເກີດອຸບັດເຫດສັນເຂື່ອນອ່າງເກັບນ້ຳແຕກຂອງເຂື່ອນໄຟຟ້າເຊປຽນ-ເຊນ້ຳນ້ອຍເມືອງສະໜາມໄຊແຂວງອັດຕະປື.

ສະຫາຍ ວາງ ເວິນທຽນ ກ່າວວ່າ, ປະເທດຈີນແລະລາວເປັນເພື່ອນບ້ານໃກ້ຄຽງທີ່ສະໜິດແໜ້ນ, , ສອງລັດແລະປະຊາຊົນສອງປະເທດ ໄດ້ຄຽງບ່າຄຽງໄຫຼ່ກັນ, ຮ່ວມທຸກຮ່ວມສຸກ ເປັນເວລາຍາວນານ. ຕໍ່ກັບແຂວງອັດຕະປືປະສົບໄພນ້ຳຖ້ວມຢ່າງຮ້າຍແຮງ, ພວກຂ້າພະເຈົ້າມີຄວາມຮຸ້ສຶກຄືກັນກັບໄດ້ປະສົບໄພເອງ ແລະ ຮູ້ສຶກຮ້ອນໃຈເຊັ່ນດຽວກັນ. ພາຍຫຼັງເກີດໄພນໍ້າຖ້ວມແລ້ວ,  ສະຫາຍ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ, ສະຫາຍ ລີ ເຄິຊຽງ ນາຍົກລັດຖະມົນຕີ ຄະນະລັດຖະບານຈີນ ແລະ ສະຫາຍ ວັງ ຢີ ທີ່ປຶກສາແຫ່ງລັດ ລັດຖະມົນຕີກະຊວງການຕ່າງປະເທດຈີນ ໄດ້ສົ່ງໂທລະເລກສະແດງຄວາມເສົ້າສະຫຼົດໃຈເຖິງ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິບັດລາວ ປະທານປະເທດລາວ, ສະຫາຍ ທອງລຸນ ສີສຸລິດ ນາຍົກລັດຖະມົນຕີລາວ ແລະ ສະຫາຍ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວ, ເພື່ອສະແດງຄວາມເສົ້າສະຫຼົດໃຈຢ່າງສຸດຊຶ້ງຕໍ່ອຸບັດເຫດດັ່ງກ່າວ ທີ່ສ້າງຄວາມເສຍຫາຍ ດ້ານຊັບສິນ ແລະ ຊີວິດຢ່າງຫລວງຫລາຍ.

ລັດຖະບານຈີນຕົກລົງຈະໃຫ້ການຊ່ວຍເຫຼືອທາງດ້ານມະນຸດສະທຳຢ່າງຮີບດ່ວນ ແກ່ ສປປ ລາວ, ລວມທັງຊ່ວຍເຄື່ອງທີ່ຕ້ອງການຢ່າງຮີບດ່ວນ ເຊັ່ນ ເຮືອໄວ 100 ລໍາ, ເຄື່ອງຕອງນໍ້າ 100 ຊຸດ ແລະ ຕູບຜ້າເຕັ້ນ 500 ເຕັ້ນ ເປັນຕົ້ນ. ສະພາກາແດງຈີນກໍຈະຊ່ວຍເງິນສົດໃຫ້ແກ່ຝ່າຍລາວ. ເຄື່ອງຊ່ວຍເຫຼືອດັ່ງກ່າວນີ້ຈະສົ່ງເຖິງຝ່າຍລາວໂດຍໄວເທົ່າທີ່ຈະໄວໄດ້.

ສະຫາຍ ວາງ ເວີນທ່ຽນ ກ່າວວ່າ, ໜ່ວຍແພດຂອງກອງທັບປົດປ່ອຍປະຊາຊົນຈີນທີ່ກຳລັງປະຕິບັດຫນ້າທີ່ການຝຶກຊ້ອມຮ່ວມກັນກູ້ໄພທາງການແພດແບບມະນຸດສະທຳທີ່ມີຊື່ວ່າ“ຂະບວນລົດໄຟສັນຕິພາບ 2018”ຢູ່ນະຄອນຫຼວງວຽງຈັນ ໄດ້ປະຕິບັດຕາມຄຳສັ່ງຈາກຂັ້ນເທິງ ແລະຈັດຕັ້ງໜ່ວຍແພດຕ້ານພະຍາດລະບາດຢ່າງຮີບດ່ວນ ແລ້ວເດີນທາງໄປເຂດປະສົບໄພນໍ້າຖ້ວມໃນວັນທີ25 ເພື່ອປະຕິບັດວຽກງານຕ້ານພະຍາດລະບາດຢູ່ບ່ອນພັກເຊົາຊົ່ວຄາວຂອງປະຊາຊົນໃນຈຸດຕ່າງໆ. ໜ່ວຍກູ້ໄພດັ່ງກ່າວເປັນໜ່ວຍກູ້ໄພທຳອິດຂອງຕ່າງປະເທດທີ່ໄປຮອດເຂດປະສົບໄພໄວກ່ອນໝູ່.   

ສະຖານທູດຈີນປະຈຳລາວຍັງໄດ້ປຸກລະດົມໃຫ້ວິສາຫະກິດຈີນ,ຄົນຈີນແລະຈີນຕ່າງດ້າວທີ່ອາໃສຢູ່ ສປປ ລາວ ເຂົ້າຮ່ວມການກູ້ໄພນ້ຳຖ້ວມຢ່າງຕັ້ງຫນ້າ, ຫລາຍບໍລິສັດແລະບຸກຄົນທັງຫຼາຍ ໄດ້ບໍລິຈາກເງິນຢ່າງຫ້າວຫັນ ເຊິ່ງໄດ້ສະແດງໃຫ້ເຫັນຈິດໃຈທີ່ດີງາມຂອງປະຊາຊົນຈີນທີ່ວ່າ: ບ່ອນໃດມີຄວາມຫຍຸ້ງຍາກ ບ່ອນນັ້ນກໍ່ຈະໄດ້ຮັບການສະໜັບສະໜູນຈາກທົ່ວສາລະທິດ.

 ສະຫາຍ ວາງ ເວີນທ່ຽນກ່າວວ່າ, ນອກຈາກລັດຖະບານຈີນຈັດຕັ້ງການກູ້ໄພຢ່າງມີແຜນແລ້ວ, ຍັງ ມີທິມງານກູ້ໄພຂອງພົນລະເມືອງຈີນຫລາຍທິມ ໄດ້ເດີນທາງໄປເຖິງເຂດປະສົບໄພຢ່າງທັນການ, ໂດຍພາຍໃຕ້ການບັນຊາການລວມຈາກຝ່າຍລາວ, ທີມງານກູ້ໄພຕ່າງໆໄດ້ເຂົ້າຮ່ວມການກູ້ໄພຢ່າງຕັ້ງໜ້າ ເຊິ່ງໄດ້ສະທ້ອນໃຫ້ເຫັນເຖິງນໍ້າໃຈຊ່ວຍເຫຼືອເຊິ່ງກັນແລະກັນຖານບ້ານພີ່ເມືອງນ້ອງໃນຍາມຕົກທຸກໄດ້ຍາກລະຫວ່າງປະຊາຊົນສອງຊາດຈີນ-ລາວ.



ຂ່າວທີ່ທ່ານອາດຈະສົນໃຈ

ຂ່າວ:
ຂ່າວໂລກ ຂ່າວໂລກ ຂ່າວອາຊຽນ
ວີດີໂອ:
ວີດີໂອ
ພາບລວມ:
ພາບລວມ
ເປີດຕຳລາສຸພາສິດ:
ເປີດຕຳລາສຸພາສິດ
China ABC:
China ABC
ຮຽນພາສາຈີນ:
ຮຽນພາສາຈີນ