location:laos.china.com > ຂ່າວ > ຂ່າວຈີນ > ເນື້ອໃນ

ທ່ານ​ສີ​ຈິ້ນ​ຜິງ​ເດີນ​ທາງ​​​ເຖິງ​ນະ​ຄອນຫຼວງວຽງ​ຈັນ​ເລີ່ມ​ຢ້ຽມ​ຢາມ ສ​ປ​ປ ລາວ​ທາງ​ລັດ​ຖະ​ກິດ

2017-11-13 20:58:40

ວັນ​ທີ 13 ພະ​ຈິກ​ນີ້, ທ່ານ​ສີ​ຈິ້​ນ​ຜິງ ເລ​ຂາ​ທິ​ການ​ໃຫຍ່​ຄະ​ນະ​ກຳ​ມະ​ການ​ສູນ​ກາງ​ພັກ​ກອມ​ມູ​ນິດ​ຈີນ ປະ​ທານ​ປະ​ເທດ​ຈີນ​ໄດ້​ເດີນ​ທາງ​​ເຖິງ​ນະ​ຄອນຫຼວງວຽງ​ຈັນ ແລະ​ເລີ່ມ​ຢ້ຽມ​ຢາມ ສ​ປ​ປ ລາວ​ທາງ​ລັດ​ຖະ​ກິດ.|

​ເວ​ລາ 15 ໂມງຂອງວັນ​ດັ່ງ​ກ່າວ, ທ່ານ​ສີ​ຈິ້ນ​ຜິງ​ເດີນ​ທາງເຖິງ​ສະ​ໜາມ​ບິນ​ສາ​ກົນ​ວັດ​ໄຕ​ນະ​ຄອນຫຼວງວຽງ​ຈັນ ດ້ວຍ​ຍົນ​ພິ​ເສດ ແລະໄດ້​ຮັບ​ການ​ຕ້ອນ​ຮັບ​ຢ່າງ​ອົບ​ອຸ່ນ​ຈາກ​ທ່ານ​ພັນ​ຄຳ​ ວິ​ພາ​ວັນ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ​ປະ​ຊາ​ຊົນ​ປະ​ຕິ​ວັດ​ລາວ​ ຜູ້​ປະ​ຈຳ​ການ​ຄະ​ນະ​ເລ​ຂາ​ທິ​ການ​ສູນ​ກາງ​ພັກ ຮອງ​ປະ​ທານ​ປະ​ເທດ ແຫ່ງ ສ​ປ​ປ​ ລາວ, ທ່ານ​ສິນ​ລະ​ວົງ ຄຸດ​ໄພ​ທູນ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ​ ເລ​ຂາ​ຄະ​ນະ​ພັກ ທັງ​ເປັນ​ເຈົ້າ​ຄອງ​ນະ​ຄອນຫຼວງວຽງ​ຈັນ, ທ່ານ​ສອນ​ໄຊ ສີ​ພັນ​ດອນ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ​ ຮອງ​ນາ​ຍົກ​ລັດ​ຖະ​ມົນ​ຕີ ແຫ່ງ ສ​ປ​ປ ລາວ ແລະ​ຜູ້​ນຳ​ທ່ານ​ອື່ນໆ. ຊາວ​ໜຸ່ມ​ລາວ​​ກໍໄດ້​ມອ​ບ​ຊໍ່​ດອກ​ໄມ້​ສົດ​ໃຫ້​ແກ່​ທ່ານ​ສີ​ຈິ້ນ​ຜິງ ແລະ​ກອງ​ກຽດ​ຕິ​ຍົດ​ຢືນ​ຢູ່​ສອງ​ຟາກ​​ທີ່​ປູ​ພົມ​ແດງ.

ທ່ານ​ສີ​ຈິ້ນ​ຜິງ​ໄດ້​ແຈກ​ຢາຍ​ບົດ​ປາ​ໄສ​ໃຫ້​ສື່ມວນ​ຊົນ​ຢູ່​ສະ​ໜາມ​ບິນ ໂດຍ​ໄດ້​ຕາງ​ໜ້າ​ພັກ, ລັດ ແລະ​ປະ​ຊາ​ຊົນ​ຈີນ​ສະ​ແດງ​ຄວາມ​ຖາມ​ຂ່າວ​ຢ່າງ​ຈິງ​ໃຈ ແລະ​ຄວາມອວຍ​ພອນ​ອັນ​ປະ​ເສີດ​ມາ​ຍັງ​ພັກ, ລັດ ແລະ​ປະ​ຊາ​ຊົນ​ລາວ​ທີ່​ເປັນ​ອ້າຍ​ນ້ອງ​ກັນ ໂດ​ຍ​ກ່າວ​ເນັ້ນ​ວ່າ, ຈີນ ແລະ ລາວ​ລ້ວນ​ແຕ່​ເປັນ​ປະ​ເທດ​ສັງ​ຄົມ​ນິ​ຍົມ​ທີ່​ນຳ​ພາ​ໂດຍ​ພັກ​ກອມ​ມູ​ນິດ​ ແລະ​ເປັນ​​ບ້ານ​ໃກ້​ທີ່​ດີ, ເພື່ອນ​ມິດ​ທີ່​ດີ, ສະ​ຫາຍ​ທີ່​ດີ ແລະ​​ຄູ່​​ຮ່ວມທີ່​ດີ. ນັບ​ແຕ່​ສອງ​ປະ​ເທດ​ສ້າງ​ສາຍ​ພົວ​ພັນ​ທາງ​ການ​ທູດຕະຫຼອດ 56 ປີ​ມາ​ນີ້, ມິດ​ຕະ​ພາບ​ຖານ​ບ້ານ​ໃກ້​ເຮືອນ​ຄຽງ​ທີ່​ດີລະ​ຫວ່າງ​ສອງ​ປະ​ເທດທີ່​ເປັນ​ມູນ​ເຊື້ອ​ໄດ້​ຜ່ານ​​ການ​ທົດ​ສອບ​ຈາກສ​ະ​ຖາ​ນະ​ການ​ສາ​ກົນ​ທີ່​ປ່ຽນ​ແປງ​ເລື້ອຍໆ. ສາຍ​ພົວ​ພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ​ລ​ະ​ຫວ່າງ​ສອງ​ປະ​ເທດ​ໄດ້​ຂະ​ຫຍາຍ​​ຕົວ​ເຂົ້າສູ່​ລວງ​ເລິກ ເຊິ່ງ​ບໍ່​ພຽງ​ແຕ່​ນຳ​ເອົາ​ຜົນ​ປະ​ໂຫຍດ​ແທ້​ຈິງ​ມາ​ໃຫ້​ສອງ​ປະ​ເທດ ແລະ ປະ​ຊາ​ຊົນ​ສອງ​ຊາດ​ເທົ່າ​ນັ້ນ, ຫາກ​ຍັງ​ເປັນ​ການ​ປະ​ກອບ​ສ່ວນ​ທີ່​ຕັ້ງ​ໜ້າ​ຕໍ່​ການ​ຊຸກ​ຍູ້​ສັນ​ຕິ​ພາບ, ສະ​ຖຽນ​ລະ​ພາບ ແລະ​ ຄວາມ​ຈະ​ເລີນ​ຮຸ່ງ​ເຮືອ​ຂອງ​ພາກ​ພື້ນ ກໍ​ຄືຂອງ​ໂລກ​ອີກ​ດ້ວຍ. ໃນ​ໄລ​ຍະ​ຢ້ຽມ​ຢາມ, ຂ້າ​ພະ​ເຈົ້າ​ຈະ​ພົບ​ປະ​ກັບ​ທ່ານ​ບຸນ​ຍັງ ວໍ​ລະ​ຈິດ ເລ​ຂາ​ທິ​ການ​ໃຫຍ່​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ປະ​ຊາ​ຊົນ​ປະ​ຕິ​ວັດ​ລາວ ປະ​ທານ​ປະ​ເທດ​ລາວ ແລະ​ສະ​ຫາຍ​ການ​ນຳ​ພັກ​ລັດ​ລາວ​ທ່ານ​ອື່ນໆ ​ທັງ​ແລກ​ປ່ຽນ​ກັບ​ບຸກ​ຄົນ​ວົງ​ການ​ຕ່າງໆ​ໃນ​ສັງ​ຄົມ​ລາວ​ຢ່າງກວ້າງ​ຂວາງ ເພື່ອ​ລົງ​ເລິກ​ແລກ​ປ່ຽນ​ຄວາມ​ເຫັນກ່ຽວ​ກັບ​ສາຍ​ພົວ​ພັນ​ສອງ​ພັກ​ສອງ​ລັດ​ຈີນ​ລາວ ແລະ​ບັນ​ຫາ​ທີ່​ສົນ​ໃຈ​ຮ່ວມ​ກັນ. ຂ້າ​ພະ​ເຈົ້າ​ເຊື່ອໝັ້ນ​ວ່າ ໂດຍ​ພາຍ​ໃຕ້​ຄວາມ​ພະ​ຍາ​ຍາມ​ຮ່ວມ​ຂອງ​ສອງ​ຝ່າຍ, ການ​ຢ້ຽມ​ຢາມ​ຄັ້ງ​ນີ້​ຍ່ອມ​ຈະ​ຊຸກ​ຍູ້​​ສາຍ​ພົວ​ພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ​ຈີນ-ລາວ​​ໃຫ້ກ້າວ​ຂຶ້​ນ​ສູ່​ລະ​ດັບ​ໃໝ່ ແລະ ນຳ​ເອົາ​ຄວາມ​ຜາ​ສຸກ ມາ​ໃຫ້​ປະ​ຊາ​ຊົນ​ສອງ​ຊາດຫຼາຍກວ່າ​ເກົ່າ​.

ຂະ​ບວນ​ລົດ​ຂອງ​ທ່ານ​ສີ​ຈິ້ນ​ຜິງ​ໄດ້​ເດີນ​ອອກ​ຈາກ​ສະ​ໜາມ​ບິນ​​ມຸ່ງ​ໜ້າ​ສູ່ໂຮງ​ແຮມ, ຢູ່​ທາງ​ອອກ​ສະ​ໜາມ​ບິນ​ໄດ້​ຕິດ​​ຮູບ​ພາບ​ໃຫຍ່​ຂອງ​ຜູ້​ນຳ​ສອງ​ປະ​ເທດ​ຈີນ​ລາວ. ທຸງ​ຊາດ​ສອງ​ປະ​ເທດ​ຈີນ​ລາວ​ກໍ​ປິວ​ສະ​ບັດ​ຢູ່​ຕາມ​ສອງ​ຟາກ​ຂອງ​ຖະ​ໜົນຫຼາຍ​ສາຍ ແລະ ແຂວນ​ປ້າຍ​ຄຳ​ຂວັນ​ຕ້ອນ​ຮັບ​ຢູ່​ຕາມ​ຫົວ​ຖະ​ໜົນ. ຂະ​ນະ​ທີ່ຊາວ​ໜຸ່ມ​ເຍົາ​ວະ​ຊົນ​​ກໍຢືນ​ຢູ່​ສອງ​ຂ້າງ​ຖະ​ໜົນ​ ແລະ ​ໂບກ​ທຸ​ງ​ຊາດ​ສອງ​ປະ​ເທດ​ ເພື່ອ​ສະ​ແດງ​ຄວາມ​ຮັກ​ແພງຕໍ່​ມິດ​ຕະ​ພາບ​ຈີນ-ລາວ ແລະ ​ຄວາມ​ປິ​ຕິ​ຊົມ​ຊື່ນ​ຕໍ່​ການ​ຢ້ຽມ​ຢາມ​ຂອງ​ທ່ານ​ສີ​ຈິ້​ນ​ຜິງເທື່ອ​ນີ້.


ຂ່າວທີ່ທ່ານອາດຈະສົນໃຈ

ຂ່າວ:
ຂ່າວໂລກ ຂ່າວໂລກ ຂ່າວອາຊຽນ
ວີດີໂອ:
ວີດີໂອ
ພາບລວມ:
ພາບລວມ
ເປີດຕຳລາສຸພາສິດ:
ເປີດຕຳລາສຸພາສິດ
China ABC:
China ABC
ຮຽນພາສາຈີນ:
ຮຽນພາສາຈີນ