location:laos.china.com > ຂ່າວ > ຂ່າວອາຊຽນ > ເນື້ອໃນ

ພິທີເປີດນຳໃຊ້ເຂື່ອນໄຟຟ້າ ເຊເສັດ 3

2017-01-07 10:47:42

 ພິທີເປີດນຳໃຊ້ເຂື່ອນໄຟຟ້າ ເຊເສັດ 3 ໄດ້ຈັດຂຶ້ນໃນວັນທີ 6 ມັງກອນ ນີ້, ທີ່ແຂວງສາລະວັນ ໂດຍການເປັນກຽດເຂົ້າຮ່ວມຂອງທ່ານ ປອ. ບຸນຖອງ ດີວິໄຊ ເຈົ້າແຂວງ ແຂວງຈໍາປາສັກ, ທ່ານ ຄໍາເຜີຍ ບຸດດາວຽງ  ເຈົ້າແຂວງ ແຂວງເຊກອງ, ທ່ານ ປອ ນາມ ວິຍະເກດ ເຈົ້າແຂວງ ແຂວງອັດຕະປື, ຜູ້​ອຳ​ນວຍ​ການ​ໃຫຍ່​ ລັດ​ວິ​ສາ​ຫະ​ກິດ​ໄຟ​ຟ້າ​ລາວ, ຜູ້ອຳນວຍການໃຫ່ຍ ບໍລິສັດຜະລິດໄຟຟ້າລາວມະຫາຊົນ ຕາງ​ໜ້າຜູ້ອຳນວຍການ ບໍລິສັດນໍຣິນໂກ ພ້ອມດ້ວຍການນໍາແຂວງ, ເມືອງ,ບ້ານ ແລະ ພະນັກງານ, ລັດຖະກອນທົ່ວຂະແໜງພະລັງງານ ບໍ່ແຮ່ ເຂົ້າຮ່ວມ.


 ທ່ານ ປອ. ຄໍາມະນີ ອິນທິລາດ, ກຳມະການສູນກາງພັກ ສະມາຊິກສະພາແຫ່ງຊາດ, ເລຂາຄະນະພັກ, ລັດຖະມົນຕີກະຊວງພະລັງງານ ແລະ ບໍ່ແຮ່ ກ່າວວ່າ: ໃນຊຸມ​ປີ​ທີ່​ຜ່ານ​ມາຂະແໜງພະລັງງານບໍ່​ແຮ່ ໄດ້ດຳ​ເນີນ​ການວາງ​ກອບຍຸດ​ທະ​ສາດເພື່ອພັດທະນາລະບົບໄຟຟ້າ​​​ຢ່າງ​ຖືກຕ້ອງຕາມແນວທາງຫັນເປັນອຸດສາຫະກໍາ ແລະ ທັນສະໄໝ ຂອງພັກທີ່​ໄດ້​ກຳນົດ​ອອກ​ຢູ່​ໃນມະຕິ​ກອງ​ປະຊຸມ​ໃຫຍ່​​ຂອງພັກ​​​ ແລະ ​ແຜນ​ພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ, ເປັນຕົ້ນແມ່ນ ການພັດທະນາແຫຼ່ງຜະລິດພະລັງງານໄຟຟ້າ ໂດຍນໍາໃຊ້ແຫຼ່ງນໍ້າທໍາມະຊາດ ຊຶ່ງແມ່ນທ່າແຮງທີ່ສໍາຄັນ ຂອງປະເທດຊາດ, ແນ​ໃສ່​ຈັດ​ສັນ​ ແລະ ​ນຳ​ໃຊ້​ແຫຼ່ງຊັບພະຍາກອນ​​ນ້ຳໃຫ້​ມີ​ປະສິດທິ​ຜົນ​ສູງ ຊຶ່ງປະກອບດ້ວຍ​ບັນດາ​ໂຄງການ,​ ແຜນ​ງານ​ທີ່​ສຳຄັນ​ ​ແລະ ​ເປັນ​ລະບົບຄົບ​ຊຸດ​, ມີທັງ​ໄລຍະ​ສັ້ນ, ໄລຍະ​ກາງ ​ແລະ ໄລຍະ​ຍາວ​​, ​ແນ​ໃສ່​ເພື່ອ​ຜະລິດ ​ແລະ ສະໜອງ​ກະ​ແສ​ໄຟຟ້າ ໃຫ້​ພຽງພໍ​ກັບ​ຄວາມ​ຕ້ອງການ ເພື່ອ​ຊົມ​ໃຊ້ຢູ່​ພາຍ​ໃນ,​​ ເພີ່ມທະວີການ​ສົ່ງ​ອອກໃຫ້ນັບ​ມື້​ເພີ່ມ​ຂຶ້ນ, ບົນ​ພື້ນຖານ​ຮັບປະກັນ​ການ​ພັດທະນາ​ພະລັງງານ​ໄຟຟ້າ ​ແບບ​​ເປັນ​ມິດ​ກັບ​ສິ່ງ​ແວດ​ລ້ອມ ​ແລະ ຍືນ​ຍົງ​. ດັ່ງ​ຄຳ​ຂັວນຂອງ​ກະຊວງພະລັງງານ ​ແລະ ບໍ່​ແຮ່ ທີ່​ວ່າ: “ພັດທະນາພະລັງງານ ​ແລະ ບໍ່​ແຮ່ ຕາມ​ທິດ​ຫັນ​ເປັນ​ອຸດສາຫະກຳ​ ແລະ ທັນ​ສະ​ໄໝ ຂຸດ​ຄົ້ນ ແລະ ນຳ​ໃຊ້ທ່າ​ແຮງຊັບພະຍາກອນ​ທຳ​ມະ​ຊາດ​ ໃຫ້​ຮັບປະກັນ​ຄວາມ​ຍືນ​ຍົງ, ສົ່ງ​ເສີມຫົວໜ່ວຍ​ເສດຖະກິດ​ຂອງ​ຊາດ​ໃຫ້​ເຂັ້ມ​ແຂງ, ຍູ້​ແຮງ​ການ​ສະໜອງ​ໄຟຟ້າຮັບ​ໃຊ້​ພາຍ​ໃນ​ໃຫ້​ພຽງພໍ ​ແລະ ໝັ້ນຄົງ, ​ເຊື່ອມ​ໂຍງແລກປ່ຽນ​ພະລັງງານ​ກັບປະ​ເທດ​ເພື່ອນ​ບ້ານ ​ແລະ ພາກ​ພື້ນ, ພັດທະນາ​ພະລັງງານ ​ແລະ ບໍ່​ແຮ່ ​ເພີ່ມ​ຂຶ້ນ​ດ້ວຍ​ສີຂຽວ ​ແລະ ສົດ​ໃສ” ເຊິ່ງພວກເຮົາເຫັນໄດ້ວ່າຜົນສຳ​ເລັດ​ຂອງໂຄງການເຂື່ອນ​ໄຟຟ້າ​ເຊເສັດ 3 ແມ່ນຜົນສໍາເລັດທີ່ສໍາຄັນ ແລະ ເປັນພື້ນຖານໃນ​ການສືບຕໍ່​ພັດທະນາ ອຸດສາຫະກຳ​​​ໄຟຟ້າ​ຢູ່ປະເທດລາວ ໃຫ້​ຂະຫຍາຍຕົວ​ ຢ່າງ​ເປັນ​ລະບົບ​ຕໍ່​ເນື່ອງ ປະກອບສ່ວນ​ທີ່​ສຳຄັນ​ເຂົ້າ​ໃນການ​ພັດທະນາ​ເສດຖະກິດ-ສັງ​ຄົມຂອງ​ຊາດເປັນຕົ້ນ ແມ່ນການ​ພັດທະນາ​ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາ​ເຜົ່າໃຫ້​ນັບ​ມື້ດີ​ຂຶ້ນ​,​ ຊຶ່ງໃນສະເພາະໜ້ານີ້ຈະເປັນເງື່ອນໄຂທີ່ສໍາຄັນ ປະກອບສ່ວນເຂົ້າໃນການເຮັດທົດລອງວຽກງານ 3 ສ້າງຄື: ສ້າງ​ແຂວງ​ເປັນ​ຫົວໜ່ວຍ​ຍຸດ​ທະ​ສາດ, ສ້າງ​ເມື​ອງ​ເປັນ​ຫົວ​ໜ່ວຍ​ເຂັ້ມ​ແຂງ​ຮອບດ້ານ ​ແລະ ສ້າງ​ບ້ານ​ເປັນ​ຫົວໜ່ວຍ​ພັດທະນາ​​, ​ສ້າງພື້ນຖານອັນໜັກແໜ້ນ ເພື່ອເຮັດ​ໃຫ້ ສປປ ລາວ ​ກາຍ​ເປັນ​ໃຈກາງ​ດ້ານ​ພະລັງງານໃນອະນາຄົດ.


ທ່ານ ບຸນອູ້ມ ສີວັນເພັງ ຜູ້ອຳນວຍກາຍໃຫຍ່ລັດວິສະຫະກິດໄຟຟ້າລາວ ກ່າວວ່າ: ໂຄງການເຂື່ອນໄຟຟ້າເຊເສັດ 3 ແມ່ນ 1 ໃນບັນດາໂຄງການທີ່ລັດວິສາຫະກິດໄຟຟ້າລາວກຳລັງດຳເນີນການກໍ່ສ້າງຢູ່ໃນປະຈຸບັນນີ້. ໂຄງການນີ້ ມີກຳລັງຕິດຕັ້ງ 23 MW  ສາມາດຜະລິດກະແສໄຟຟ້າໄດ້ຕໍ່ປີ ມູນຄ່າການກໍ່ສ້າງທັງໝົດ 50,7 ລ້ານໂດລາ ໂດຍທຶນກູ້ຢືມຈາກ ທະນາຄານ EXIM BANK ແຫ່ງ ສປ. ຈີນ ຮັບເໝົາກໍ່ສ້າງໂດຍ ບໍລິສັດ NORINCO ເລີ່ມການກໍ່ສ້າງໃນວັນທີ  17/1/2014 ແລະ ສໍາເລັດ ກ່ອນ​ແຜນການ 25/7/2016. ດ້ວຍຄວາມຮັບຜິດຊອບສູງຂອງຄະນະ​ນຳ ​ລັດ​ວິ​ສາ​ຫະກິດ​ໄຟຟ້າ​ລາວ​, ຄະນະໂຄງການ ແລະ ວິຊາການ ທີ່ໄດ້ສູ້ຊົນ ບຸກບືນສຸມທຸກເຮື່ອແຮງ ສະຕິປັນຍາ ບວກກັບການ ສະໜັບສະໜູນ ການຮ່ວມມືທີ່ດີ ຈາກອຳນາດການປົກຄອງ ແລະ ປະຊາຊົນບັນດາເຜົ່າ ຂອງແຂວງຈໍາປາສັກ ແລະ ແຂວງສາລະວັນ ຈຶ່ງເຮັດໃຫ້ການກໍ່ສ້າງສຳເລັດກ່ອນແຜນການ. ໂຄງການ​ດັ່ງກ່າ​ວໄດ້ເລີ່ມຕົ້ນຜະລິດກະແສໄຟຟ້າ ໃນວັນທີ 25 ​ເດືອນ ກໍລະກົດ 2016, ຮອດປະຈຸບັນສາມາດຜະລິດກະແສໄຟຟ້າໄດ້ທັງໝົດ 27 ລ້ານກິໂລວັດໂມງ, ຄິດເປັນເງິນ 10 ຕື້ກີບ.


ທ່ານ ຫວັງເຢ້ວຖ່າວ ຜູ້ອຳນວຍການໃຫຍ່ ບໍລິສັດ NORINGO ໄດ້ກ່າວວ່າ:ໂຄງການເຂື່ອນໄຟຟ້າເຊເສັດ3ແມ່ນນອນຢູ່ໃນແຜນການພັດທະນາເຂື່ອນໄຟຟ້າຢູ່ແມນໍ້າເຊເສັດ,ນີ້ແມ່ນໂຄງການເຂື່ອນໄຟຟ້ານ້ຳຕົກແຫ່ງທີສາມ  ທີ່ລັດວິສາຫະກິດໄຟຟ້າລາວໄດ້ສຳເລັດການກໍ່ສ້າງຕໍ່ຈາກໂຄງການເຂື່ອນໄຟຟ້າເຊເສັດ1ແລະ ເຊເສັດ2. ການກໍ່ສ້າງແລະການບໍລິຫານຂອງໂຄງການນີ້ໄດ້ຊຸກຍູ້ການພັດທະນາເສດຖະກິດທ້ອງຖີ່ນ,ຈະສະໜອງພະລັງງານສະອາດເພື່ອການພັດທະນາເສດຖະກິດຂອງລາວແລະສ້າງຜົນປະໂຫຍດໃນໄລຍະຍາວໃຫ້ແກ່ ສປປ ລາວ.


ຂ່າວທີ່ທ່ານອາດຈະສົນໃຈ

ຂ່າວ:
ຂ່າວໂລກ ຂ່າວໂລກ ຂ່າວອາຊຽນ
ວີດີໂອ:
ວີດີໂອ
ພາບລວມ:
ພາບລວມ
ເປີດຕຳລາສຸພາສິດ:
ເປີດຕຳລາສຸພາສິດ
China ABC:
China ABC
ຮຽນພາສາຈີນ:
ຮຽນພາສາຈີນ