location:laos.china.com > ຂ່າວເດັ່ນ > ເນື້ອໃນ

ຜູ້ອຳນວຍການໃຫຍ່ສະຖານີວິທະຍຸ-ໂທລະພາບສູນກາງຈີນອວຍພອນປີໃໝ່ຕໍ່ມິດລາຍການຊາວຕ່າງປະເທດ

2019-01-01 16:14:27

ວັນທີ 1 ມັງກອນປີ 2019, ທ່ານເຊີ້ນໄຫສົງ ຜູ້ອຳນວຍການໃຫຍ່ສະຖານີວິທະຍຸ-ໂທລະພາບສູນກາງຈີນ ໄດ້ກ່າວປາໄສ ທັງອວຍພອນປີໃໝ່ຕໍ່ມິດລາຍການຊາວຕ່າງປະເທດທົ່ວໂລກຂອງສະຖານີວິທະຍຸ-ໂທລະພາບສູນກາງໃນໂອກາດປີໃໝ່ທີ່ໝູນວຽນມາເຖິງ ໂດຍຜ່ານຄື້ນວິທະຍຸແລະເຄືອຂ່າຍອິນເຕີເນັດ. ທ່ານເຊີ້ນໄຫສົງ ກ່າວວ່າ: ການທີ່ລາຍງານຂ່າວຈີນສູ່ໂລກ ແລະ ລາຍງານຂ່າວໂລກສູ່ຈີນ ເພື່ອເສີມສ້າງຄວາມເຂົ້າໃຈກັນແລະສ້າງມິດຕະພາບລະຫວ່າງປະຊາຊົນບັນດາປະເທດໃນໂລກ ເປັນຄວາມຕັ້ງໃຈແຕ່ຫົວທີແລະເປັນພາລະໜ້າທີ່ອັນບໍ່ປ່ຽນແປງຈັກເທື່ອຂອງສະຖານີວິທະຍຸ-ໂທລະພາບສູນກາງຢ່າງສະເໝີຕົ້ນສະເໝີປາຍ. ປີ 2019 ຈະເປັນປີສ້າງຕັ້ງສາທາລະນະລັດປະຊາຊົນຈີນຄົບຮອບ 70 ປີ, ສະຖານີວິທະຍຸ-ໂທລະພາບສູນກາງຈະນຳສະເໜີຈີນໃນຍຸກໃໝ່ຕາມຄວາມຄວາມຈິງ, ທຸກແງ່ມູມ ແລະ ຮອບດ້ານສູ່ມິດລາຍການຊາວຕ່າງປະເທດ ຢ່າງຫຼວງຫຼາຍແລະລະອຽດກວ່າເກົ່າ.ລາຍ​ລະ​ອຽດ​ຄື​ດັ່ງ​ນີ້:

ບັນດາເພື່ອນມິດທີ່ສະໜິດສະໜົມ:

ໂອກາດແສງຕາເວັນແຫ່ງປີໃໝ່ໄດ້ສາດສ່ອງລົງສູ່ພື້ນໂລກ, ໂດຍຕາງໜ້າສະຖານີວິທະຍຸ-ໂທລະພາບສູນກາງ ພ້ອມດ້ວຍເພື່ອນຮ່ວມງານທັງຫຼາຍ, ຂ້າພະເຈົ້າຂໍສົ່ງຄຳອວຍພອນອັນປະເສີດມາຍັງບັນດາມິດລາຍການຊາວຕ່າງປະເທດ ຂໍອວຍພອນໄຊໃຫ້ບັນດາທ່ານຈົ່ງມີແຕ່ຄວາມສຸກກາຍ-ສະບາຍໃຈຕະຫຼອດປີໃໝ່!

ກ່ອນໜ້ານີ້ 1.300 ກວ່າປີ, ຫວາງໂປ ນັກກະວີທີ່ຍິ່ງໃຫຍ່ໃນສະໄໝລາຊະວົງຖັງຂອງຈີນໄດ້ຂຽນຄຳກະວີທີ່ມີຊື່ສຽງ “ຄັນວ່າໃຈປະສົງແລ້ວ ກາງດົງກໍວ່າມໍ່” ຂະນະທີ່ສົ່ງເພື່ອນມິດຂອງຕົນອອກເດີນທາງໄປດຳລົງຕຳແໜ່ງໃໝ່ຢູ່ໄກແສນໄກ. ຄັນວ່າໃຊ້ຄຳກະວີດັ່ງກ່າວມາພັນລະນາຈິດອາລົມຂອງພວກເຮົາໃນຂະນະນີ້ ຄິດວ່າຖືກຕ້ອງເໝາະສົມຫຼາຍນໍ.

ເພາະວ່າເວົ້າສຳລັບບັນດາທ່ານແລ້ວ, ນີ້ອາດຈະເປັນສຽງທີ່ໃໝ່ອ່ຽມ. ແມ່ນແລ້ວ, ເມື່ອເດືອນມີນາປີ 2018, ຈີນໄດ້ສ້າງຕັ້ງສະຖານີວິທະຍຸ-ໂທລະພາບສູນກາງ ເພື່ອໃຫ້ສອດຄ່ອງກັບທ່າອ່ຽງການເຊື່ອມໂຍງແລະພັດທະນາຂອງສື່ມວນຊົນຕ່າງໆໃນໂລກ ໂດຍໄດ້ໂຮມເຂົ້າກັນລະຫວ່າງວິທະຍຸສາກົນແຫ່ງປະເທດຈີນ ຫຼື CRI, ໂທລະພາບສູນກາງຈີນ ຫຼື CCTV ແລະ ວິທະຍຸປະຊາຊົນສູນກາງຈີນ ເຊິ່ງເປັນສື່ມວນຊົນ 3 ແຫ່ງທີ່ທ່ານຄົງຈະຄຸ້ນຫູເລື້ອຍໆ. ເວລານັ້ນ, ທ່ານຣີຄາໂດ ເຮຍຕາ ມິດລາຍການຊາວອັກຊັງຕິນໄດ້ຂຽນຂໍ້ຄວາມລົງໃນສື່ສັງຄົມອອນລາຍວ່າ:

ຊົມເຊີຍການສ້າງສະຖານີວິທະຍຸໂທລະພາບສູນກາງຈີນ! ເຮັດໃຫ້ຂ້ອຍຮູ້ສຶກວ່າ ຈີນຍັງຄົງໃກ້ຊິດແລະດີງາມຫຼາຍ, ທັງເຮັດໃຫ້ຂ້ອຍມີຄວາມຮັບຮູ້ເລິກເຊິ່ງກວ່າເກົ່າຕໍ່ກຳລັງຂອງມິດຕະພາບ.

ຂອບໃຈທີ່ເພື່ອນມິດທັງເກົ່າແລະໃໝ່ທີ່ໃຫ້ກຳລັງໃຈທີ່ຈິງໃຈເພື່ອເຮັດໃຫ້ພວກເຮົາບໍ່ລືມອຸດົມການແຕ່ຫົວທີ! ສະຖານີວິທະຍຸໂທລະພາບສູນກາງຈີນທີ່ສ້າງຕັ້ງຂຶ້ນໃໝ່ຍັງຄົງແບກຫາບໜ້າທີ່ໃນການລາຍງານເຫດການໃນຈີນຕໍ່ໂລກ,ໃນທາງກັບກັນໄດ້ລາຍງານເຫດການຂອງໂລກຕໍ່ຊາວຈີນ, ເພື່ອເພີ່ມຄວາມເຂົ້າໃຈແລະສ້າງມິດຕະພາບລະຫວ່າງປະຊາຊົນບັນດາປະເທດໃນໂລກ. ພວກເຮົາມີຄວາມຕັ້ງໃຈວ່າຈະເຮັດໃຫ້ໄດ້ດີກວ່າເກົ່າແລະໃຫ້ທ່ານເພິ່ງພໍໃຈຫຼາຍກວ່າເກົ່າ.

ທ່ານປະທານສີຈິ້ນຜິງກ່າວວ່າ: “ການພັດທະນາຂອງຈີນແຍກອອກຈາກໂລກບໍ່ໄດ້, ຄວາມຈະເລີນຮຸ່ງເຮືອງຂອງໂລກກໍຕ້ອງການຈີນເຊັ່ນກັນ.” ໃນໄລຍະໜຶ່ງປີຜ່ານມາ, ພວກເຮົາໄດ້ສຸມທຸກຄວາມພະຍາຍາມໃນການເພີ່ມທະວີການແລກປ່ຽນຂໍ້ມູນຂ່າວສານລະຫວ່າງຈີນກັບໂລກດ້ວຍກ້ອງຖ່າຍ, ໄມແລະປາກກາເຊັ່ນ: ການລາຍງານກ່ຽວກັບການສະເຫຼີມສະຫຼອງການປະຕິຮູບແລະເປີດປະຕູສູ່ພາຍນອກຄົບຮອບ 40 ປີ, ງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດ, ກອງປະຊຸມເວທີປຶກສາຫາລືການຮ່ວມມືຈີນ-ອາຟຣິກກາແລະອື່ນໆເຊິ່ງໄດ້ຮັບຄວາມສົນໃຈຈາກຊາວໂລກຢ່າງກວ້າງຂວາງ; ພວກເຮົາໄດ້ສົ່ງສຽງດ້ວຍຄວາມຍຸຕິທຳແລະຄວາມເປັນທຳຢ່າງເດັດດ່ຽວ ຄື: ລາຍງານຂ່າວໂດຍສະແດງທ່າທີຢ່າງຈະແຈ້ງແລະຕອບໂຕ້ຢ່າງສົມເຫດສົມຜົນໃນດ້ານການປົກປ້ອງການຄ້າເສລີ, ການຊຸກຍູ້ການເຊື່ອມໂຍງເສດຖະກິດໃຫ້ເປັນອັນດຽວກັນ, ທັງໄດ້ລາຍງານຈຸດຢືນຂອງຈີນໃນກອງປະຊຸມສຸດຍອດAPECແລະກອງປະຊຸມສຸດຍອດກຸ່ມ20ປະເທດຫຼືG20 ແລະເຫດການສຳຄັນອື່ນໆ ເຊິ່ງໄດ້ເປັນທີ່ຍອມຮັບໂດຍທົ່ວໄປ; ພວກເຮົາໄດ້ສຸມທຸກຄວາມພະຍາຍາມໃນການເຊື່ອມຕໍ່ຈີນກັບຕ່າງປະເທດ ດ້ວຍ APPເປັນຫຼາຍພາສາເຊັ່ນ: “ຈີນ-ຣັດເຊຍ”, “ຈີນ-ອີຕາລີ”, “ຈີນ-ແອັສປາຍ”ແລະອື່ນໆທັງໄດ້ປັບປຸງຍົກລະດັບໃຫ້ວ່ອງໄວທັນໃຈແກ່ຜູ້ບໍລິໂພກໄດ້ດີກວ່າເກົ່າ. ກິດຈະກຳແລກປ່ຽນທາງອ໋ອນລາຍເຊັ່ນ “ກົດໄລກອງປະຊຸມສຸດຍອດອົງການຮ່ວມມືຊຽງໄຮ” “ນັດພົບກັນທີ່ງານວາງສະແດງສິນຄ້ານຳເຂົ້າສາກົນຈີນທີ່ຊຽງໄຮ”ແລະອື່ນໆເຊິ່ງໄດ້ດຶງດູດມິດລາຍການທີ່ນິຍົມຊົມຊ້ອບຂອງບັນດາປະເທດຈຳນວນຫຼວງຫຼາຍເຂົ້າມາມີສ່ວນຮ່ວມ; ພວກເຮົາຕັ້ງໜ້າສື່ສານກັບໂລກເຊັ່ນ ຈັດກອງປະຊຸມສຸດຍອດສື່ມວນຊົນອາຊີຂອງເວທີປຶກສາຫາລືອາຊີໂປອາວ, ກອງປະຊຸມເວທີປຶກສາຫາລືສື່ມວນຊົນເສດຖະກິດການເງິນແລະຄັງປັນຍາສາກົນຮົງຊຽວ ເຊິ່ງໄດ້ສ້າງຄວາມສົນໃຈໃຫ້ແກ່ສື່ມວນຊົນທົ່ວໂລກ. ນອກນີ້ ຍັງໄດ້ຈັດກິດຈະກຳຕ່າງໆເຊັ່ນ: ການສາຍຮູບເງົາດີເດັ່ນຈີນຢູ່ອາຟຣິກກາ, “ລະຄອນໂທລະພາບຈີນ” “ຂ້ອຍນິຍົມຈີນ”ແລະອື່ນໆໄດ້ເຮັດໃຫ້ເພື່ອນມິດປະເທດຕ່າງໆໃນໂລກນິຍົມຈີນຫຼາຍກວ່າເກົ່າ.

ປີໃໝ່ 2019 ນີ້, ພວກເຮົາຈະສະເຫຼີມສະຫຼອງວັນສ້າງຕັ້ງສາທາລະນະລັດປະຊາຊົນຈີນຄົບຮອບ 70 ປີ. ສະຖານີວິທະຍຸໂທລະພາບສູນກາງຈີນຈະສຸມທຸກຄວາມພະຍາຍາມລາຍງານເຫດການໃນຫຼາຍຮູບຫຼາຍແບບເພື່ອໃຫ້ເພື່ອນມິດທັງຫຼາຍຮັບຮູ້ເຂົ້າໃຈຈີນໃນຍຸກໃໝ່ຢ່າງແທ້ຈິງ, ຈາກຫຼາຍແງ່ມູມ ຮອບດ້ານກວ່າເກົ່າ. ປີໃໝ່ 2019 ນີ້, ພວກເຮົາຈະຈັດທຳລາຍການດີເດັ່ນຈຳນວນຫຼາຍທີ່ໜ້າປະທັບໃຈ, ໜ້າຊື່ນຊົມແລະນິຍົມຊົມຊອບກວ່າເກົ່າເພື່ອມອບໃຫ້ມິດລາຍການທັງຫຼາຍ. ແລະສະແດງໃຫ້ເຫັນວ່າຈີນແມ່ນ “ຜູ້ສ້າງສັນຕິພາບໃຫ້ໂລກ, ຜູ້ປະກອບສ່ວນໃນການພັດທະນາໂລກແລະຜູ້ປົກປັກຮັກສາລະບຽບສາກົນ” ດ້ວຍຄວາມຈິງ. ພວກເຮົາຈະພະຍາຍາມປະດິດສ້າງວິທີເຜີຍແຜ່ໃໝ່, ນຳໃຊ້ເຕັກນິກໃໝ່ເຊັ່ນ: 5G, AI, Big data, Cloud Computingແລະອື່ນໆ, ເລັ່ງລັດບັນລຸເປົ້າໝາຍການພັດທະນາທີ່ມີຄຸນນະພາບສູງແລະແບບກ້າວກະໂດດຂັ້ນ, ພະຍາຍາມສ້າງສື່ມວນຊົນສຳຄັນແບບໃໝ່ທີ່ມີລັກສະນະນຳໜ້າສາກົນ, ແລະຮັບໃຊ້ຜູ້ບໍລິໂພກໃຫ້ດີກວ່າເກົ່າ.

ທ່ານຢຸຣິ ຕາວະຣົຟສະກີ, ນັກຄົ້ນຄວ້າກ່ຽວກັບຈີນທີ່ມີຊື່ສຽງຂອງຣັດເຊຍ, ນັກຂຽນປຶ້ມ “ທ່ານສີຈິ້ນຜິງ: ພວມບັນລຸຄວາມໄຝ່ຝັນຂອງຈີນ” ເຊິ່ງເປັນເພື່ອນມິດເກົ່າຂອງພວກເຮົາເຄີຍໂທຫາພວກເຮົາວ່າ: “ຂ້າພະເຈົ້າເຊື່ອວ່າ, ຈີນສະເໜີສ້າງປະຊາຄົມຮ່ວມຊາຕາກຳມວນມະນຸດ, ແມ່ນດວງໄຟເຍືອງທາງໃຫ້ແກ່ການພັດທະນາຂອງໂລກ.” ເປັນຄວາມແນ່ນອນທີ່ສຸດແລ້ວວ່າ, ມວນມະນຸດມີພຽງໂລກໜ່ວຍດຽວ, ປະເທດຕ່າງໆຢູ່ຮ່ວມກັນໃນໂລກດຽວກັນ. ຂໍໃຫ້ມວນມະນຸດສ້າງຄວາມພະຍາຍາມຮ່ວມເພື່ອສ້າງປະຊາຄົມຮ່ວມຊາຕາກຳມວນມະນຸດ, ສ້າງໂລກທີ່ມີສັນຕິພາບຖາວອນ, ມີຄວາມປອດໄພທົ່ວໄປ, ມີຄວາມຈະເລີນຮຸ່ງເຮືອງຮ່ວມກັນ, ເປີດປະຕູສູ່ພາຍນອກແລະກວມລວມ, ສະອາດແລະສວຍງາມ.

ຂໍອວຍພອນບັນດາທ່ານອີກເທື່ອໜຶ່ງ! ຂໍຂອບໃຈ!



ຂ່າວທີ່ທ່ານອາດຈະສົນໃຈ

ຂ່າວ:
ຂ່າວໂລກ ຂ່າວໂລກ ຂ່າວອາຊຽນ
ວີດີໂອ:
ວີດີໂອ
ພາບລວມ:
ພາບລວມ
ເປີດຕຳລາສຸພາສິດ:
ເປີດຕຳລາສຸພາສິດ
China ABC:
China ABC
ຮຽນພາສາຈີນ:
ຮຽນພາສາຈີນ