location:laos.china.com > ເປີດຕຳລາສຸພາສິດ > ເນື້ອໃນ

ຍາມ​ສະໜຸກ​ຢ່າ​ລືມ​ອຸບາດ

2017-10-24 17:28:52

ສຳນວນ​ພາສາ​ຈີນ ຈີ່​ອ່ານ​ຊື່​ເວີ່​ຍ ​ແປ​ເປັນ​ພາສາ​ລາວ ຄື ຍາມ​ສະໜຸກ​ຢ່າ​ລືມ​ອຸບາດ, ໝາຍ​ຄວາມ​ວ່າ ຍາມ​ຢູ່​ໃນ​ສະພາບ​ທີ່​ມີ​ຄວາມ​ສະຫງົບ​ດີ​ ກໍ​ຄວນ​ຄິດ​ເຖິງ​ສະພາບ​ທີ່​ອາດ​ຈະ​ເກີດ​ໄພພິບັດ. ຄົນ​ທັງຫຼາຍ​ໃຊ້​ສຳນວນ​ນີ້​ມາ​ອຸປະມາ​ວ່າ ຕ້ອງ​ຮັກສາ​ສະຕິ​ລະວັງ​ຕົວຢ່າງ​ສູງ ​ເພື່ອ​ປ້ອງ​ກັນ​ບໍ່​​ໃຫ້​ເກີດ​ຄວາມ​ຫາ​ຍະ​ນະກັບ​ຕົນ.

​ໃນ​ສະ​ໄໝ​ຊຸນ​ຊິວ(ປີ 770-476 ກ່ອນ ຄສ), ມີ​ເທື່ອ​ໜຶ່ງ, ມີ 12 ​ແຄວ້ນ​ຮ່ວມ​ກັນ​ເຄື່ອນ​ທັບ​ບຸກໂຈມ​ຕີ​ແຄວ້ນ​ເຈິ້ງ. ​ເຈົ້າຄອງ​ແຄວ້ນ​ເຈິ້ງ ກະວົນກະວາຍຫຼາຍ ຈຶ່ງຮີບ​ຂໍ​ເຈລະຈາ​ສະຫງົບ​ເສິກ​ກັບແຄວ້ນ​ຈິ້ນ ທີ່​ເປັນ​ແຄວ້ນໜຶ່ງ​ທີ່​ໃຫຍ່​ທີ່​ສຸດ​ໃນ 12 ​ແຄວ້ນ​ນັ້ນ. ແຄ​ວ້ນຈິ້ນ ​ເຫັນ​ດີຢຸດ​ສົງຄາມ ​ແລະ ອີກ 11 ​ແຄ​ວ້ນກໍ​ຢຸດ​ການ​ໂຈມ​ຕີ​ແຄວ້ນ​ເຈິ້ງ​ໃນ​ທີ່​ສຸດ. ​ເພື່ອສະ​ແດງ​ຄວາມ​ຂອບ​ອົກ​ຂອບ​ໃຈ, ແຄວ້ນ​ເຈິ້ງ ຈຶ່ງ​ສົ່ງ​ຂອງຂວັນ​ໃຫ້​ແຄວ້ນ​ຈິ້ນ​ເປັນ​ຈຳນວນຫຼວງຫຼາຍ. ​ເມື່ອ​ ຈິ້ນ​ຕ້າວ​ກົ່ງ ​ເຈົ້າຄອງ​ແຄວ້ນ​ຈິ້ນ ເຫັນ​ຂອງຂວັນ​ຈຳນວນຫຼາຍປານ​ນັ້ນ ກໍ​ດີ​ພະ​ໄທ ​ແລະ​ແບ່ງ​ນາງ​ລະບຳ 8 ຄົນ​ໃຫ້​ເວີ້​ຍຈ້ຽງ ຜູ້​ເປັນ​ເສນາ​ບໍດີ​ທີ່​ໄດ້​ສ້າງ​ຄຸນງາມຄວາມດີ ທັງ​ຊົງ​ກ່າວ​ວ່າ: ທ່ານ​ໄດ້​ວາງ​ແຜນ​ອຸບາຍ​ຊ່ວຍ​ຂ້າພະ​ເຈົ້າມາຫຼາຍປີ ​ແລະ​ປະຕິບັດ​ການ​​ເປັນ​ຢ່າງ​ດີ. ດຽວ​ນີ້, ​ໃຫ້​ສອງ​ເຮົາ​ມາສະ​ເຫວີຍຄວາມ​ສຳລານ​ລື້​ນ​ເລີງຮ່ວມ​ກັນ​ສາ! ​ເວີ້​ຍຈ້ຽງ ສະ​ແດງ​ຄວາມຂອບ​ໃຈ​ຕໍ່ຈິ້ນ​ຕ້າວ​ກົ່ງ ​ແຕ່ພັດປະຕິ​ເສດ​ບໍ່​ຮັບ​ເອົາ​ນາງ​ລະບຳ​ເຫຼົ່ານັ້ນ ຊ້ຳ​ບໍ່​ໜຳ​ຍັງ​ເຕືອນຈິ້ນ​ຕ້າວ​ກົ່ງ ວ່າ: ການ​ທີ່​ວຽກ​ງານ​ຕ່າງໆ​ຂອງ​ແຄວ້ນ​ເຮົາ​ສາມາດ​ປະຕິບັດ​ໄດ້​ເປັນ​ຢ່າງ​ດີນັ້ນ ກ່ອນ​ອື່ນຕ້ອງ​​ແມ່ນ​ຄຸນງາມຄວາມດີ​ຂອງ​ເຈົ້ານາຍ​ທີ່​​ເປັນ​ເຈົ້າຄອງ​ຜູ້ເກັ່ງ​ກ້າສາມາດ ​ແລະສອງ ກໍ​ຄື​ເສນາ​ບໍດີ​ທຸກໆ​ຄົນ​ໄດ້ຮ່ວມ​ແຮງ​ຮ່ວມ​ໃຈ​​ກັນ, ສ່ວນ​ຂ້າພະ​ເຈົ້າ​ເອງ​​ມີ​ການ​ປະກອບສ່ວນ​​ເພື່ອ​ແຄວ້ນ​ຈິ້ນ​ພວກເຮົາທີ່​ສາມາດ​ຍົກ​ໃຫ້​ເຫັນນັ້ນ​ໄດ້​ຢ່າງ​ໃດ​ລະ? ຫວັງ​ວ່າ​ພະ​ອົງຈະ​ຄິດ​ເຖິງ​ວ່າ​ແຄວ້ນ​​ຈິ້ນ​ພວກ​ເຮົາ​ຍັງ​ມີພາລະ​ກິດຕ່າງໆ​ນານາ​ທີ່ຈະ​ຕ້ອງ​ເຮັດ ຂະນະ​ລື້​ນ​ເລີງ​ສຳລານ​ໃຈ. ​ໃນ​ຄຳ​ພີ ຊູ່​ຈິ່ງ ມີ​ປະ​ໂຫຍ​ກໜຶ່ງ​ເຊິ່ງ​ເວົ້າ​ໄດ້​ດີ​ສົມຄວນ ຄື: ຍາມ​ສະໜຸກ​ຢ່າ​ລືມ​ອຸບາດ, ຖ້າ​ບໍ່​ຫຼົງລືມ​ກໍ​ຈະ​ມີການກະກຽມ, ຖ້າມີ​ການກະກຽມ​ຢູ່​ກ່ອນ​ແລ້ວ​ກໍ​ຈະສາມາດຫຼີກລ່ຽງຄວາມ​ຫາ​ຍະ​ນະທີ່ຈະ​ເກີດ​ຂຶ້ນກັບ​ຕົນ​ໄດ້. ດຽວນີ້, ຂ້າພະ​ເຈົ້າຂໍ​ນຳ​ໃຊ້​ປະ​ໂຫຍ​ກນີ້​ມາ​ເຕືອນ​ເຈົ້ານາຍ!

ຄຳ​ເວົ້າຂອງ​ເວີ້​ຍຈ້ຽງ ​ເຕັມ​ໄປ​ດ້ວຍ​ນ້ຳ​ໃສ​ໃຈ​ຈິງ​ແລະ​ມີ​ຄວາມ​ໝາຍ​ອັນ​ເລິກ​ເຊິ່ງ ​ທັງ​​ເປັນຄຳ​ເຕືອນ​ທີ່ເບິ່ງ​ກວ້າງ​ເຫັນ​ໄກ ຝ່າຍ​ຈິ້ນ​ຕ້າວ​ກົ່ງ ​ເມື່ອ​ໄດ້​ຍິນ​ແລ້ວ​ກໍ​ຮູ້ສຶກ​ຕື້ນ​ຕັນ​ໃຈຫຼາຍ, ຈຶ່ງ​ເຫັນ​ດີ​ນຳ​ຄວາມ​ເຫັນ​ຂອງ​ເວີ້​ຍຈ້ຽງ ​ແລະຈາກ​ນັ້ນກໍ​ເຄົາລົບ​ຕໍ່​ເວີ້​ຍຈ້ຽງ ​ເປັນ​ຢ່າງ​ຍິ່ງ.

ທ່ານ​ສີ​ຈິ້ນ​ຜິ​ງ ​ເລຂາທິການ​ໃຫຍ່​ຄະນະ​ກຳມະການ​ສູນ​ກາງ​ພັກ​ກອມ​ມູນິດ​ຈີນ ​ໄດ້​ໃຊ້​ສຳນວນ ຈີ່​ອ່ານ​ຊື່​ເວີ່​ຍ ຫຼື ຍາມ​ສະໜຸກ​ຢ່າ​ລືມ​ອຸບາດ ​ສອງ​ເທື່ອ ຂະນະ​ສະ​ເໜີ​ບົດ​ລາຍ​ງານ​​ໃນ​ກອງ​ປະຊຸມ​ພັກ​ຄັ້ງທີ 19:

ປັດຈຸບັນ, ສະຖານະການພາຍໃນແລະຕ່າງປະເທດພວມມີການປ່ຽນແປງຢ່າງເລິກເຊິ່ງແລະສັບສົນ, ການພັດທະນາຂອງຈີນຍັງຢູ່ໃນໄລຍະທີ່ມີໂອກາດຍຸດທະສາດທີ່ສຳຄັນ, ມີອະນາຄົດທີ່​​ສົດໃສ, ທັງ​​ຜະເຊີນໜ້າກັບສິ່ງທ້າທາຍ​​ທີ່ຂ້ຽວຂາດ. ບັນດາສະຫາຍໃນພັກຕ້ອງມີສາຍຕາກວ້າງໄກ, ​ຍາມສະໜຸກຢ່າລືມອຸບາດ, ມີຄວາມກ້າຫານໃນການປ່ຽນແປງໃໝ່, ​ຕ້ອງມີຫົວຄິດປະດິດສ້າງ, ບໍ່ເຮັດວຽກແບບຕາຍຕົວ ແລະຕ້ອງກ້າວໄປໜ້າເລື້ອຍໆ, ສາມັກຄີແລະນຳພາປະຊາຊົນບັນດາເຜົ່າໃນທົ່ວປະເທດສູ້ຊົນ ​​ສ້າງສັງຄົມອີ່ມໜຳສຳລານໃນໄລຍະສຸທ້າຍໃຫ້ສຳເລັດຢ່າງຮອບດ້ານ, ຍາດເອົາໄຊຊະນະອັນຍິ່ງໃຫຍ່​​ແຫ່ງການສ້າງສັງຄົມນິຍົມທີ່ມີສີສັນພິເສດຂອງຈີນໃນຍຸກ​​ໃໝ່.

ຊຸກຍູ້ການພັດທະນາ ແລະຄວາມໝັ້ນຄົງຢ່າງເປັນເອກະພາບກັນ, ເພີ່ມທະວີສະຕິລະວັງຕົວ, ຍາມສະໜຸ​​ກ ຢ່າລືມອຸບາດ ເຊິ່ງເປັນຫຼັກການ​​ສຳຄັນຂອງພັກ​​ເຮົາໃນການປົກຄອງ ແລະການບໍລິຫານ. ຕ້ອງຍຶດໝັ້ນຖືເອົາຜົນປະໂຫຍດຂອງຊາດໄວ້ຢູ່ໃນຖານະ​​ສູງສຸດ, ຖືຄວາ​​ໝັ້ນຄົງຂອງປະຊາຊົນເປັນວັດຖຸປະສົງ, ຖືຄວາມໝັ້ນຄົງດ້ານການເມືອງເປັນກົກ, ພິຈາລະນາຢ່າງເປັນເອກະພາບກັນເຖິງຄວາມໝັ້ນຄົງທັງພາຍນອກແລະພາຍໃນ, ຄວາມໝັ້ນຄົງດ້ານດິນແດນຂອງຊາດ ແລະຂອງພົນລະເມືອງ, ຄວາມ​​ໝັ້ນຄົງດັ້ງເດີມ ແລະແບບໃໝ່, ຄວາມໝັ້ນຄົງສ່ວນຕົວ ແລະ ​​ສ່ວນລວມ, ປັບປຸງບູລະນະລະບົບລະບຽບການປ້ອງກັນຄວາມໝັ້ນຄົງຂອງຊາດ, ​ເສີມສ້າງຄວາມສາມາດປ້ອງກັຄວາມໝັ້ນຄົງແຫ່ງຊາດ, ເດັດດ່ຽວປົກປັກຮັກສາຜົນປະໂຫຍດດ້ານອະທິປະໄຕ, ຄວາມໝັ້ນຄົງແລະການພັດທະນາຂອງປະເທດ.


ຂ່າວທີ່ທ່ານອາດຈະສົນໃຈ

ຂ່າວ:
ຂ່າວໂລກ ຂ່າວໂລກ ຂ່າວອາຊຽນ
ວີດີໂອ:
ວີດີໂອ
ພາບລວມ:
ພາບລວມ
ເປີດຕຳລາສຸພາສິດ:
ເປີດຕຳລາສຸພາສິດ
China ABC:
China ABC
ຮຽນພາສາຈີນ:
ຮຽນພາສາຈີນ